gitumbán ang lióg sa prayle nga hiulian na; -dili buút mamatay, ayaw pagduol!
Si Ibarra nalipong na sa kasuko: ang iyang lawas nagakuróg, ang iyang mga mata nagtulilík. Si pari Dámaso nakigbisog ug mitindog, apan gikuptan ni Ibarra ang iyang liog ug gilambuyóg hangtud nga mitikubo ug nahipaluhód.
-Ginoo Ibarra! Ginoo Ibarra! -nagkanayón ang pipilá ka tawo.
Apan wala gayuy usá, ni ang "Alferez", nga nangahas pagduol sa pagtan-aw sa kutsilyo nga nagpangidlap kay nabanabana man nila ang kusog ug kahimtang sa buót sa batan-on. Ang tanan nanghiurong.
-Kamó, kamo diha mihilum lamang! Karón akó na usáb nga higayon. Gilikayan ko siyá, apan gihatud gayúd ni Bathalà kanako. Si Bathalà maóy maghukom! Ang batan-on halus dili makaginhawa, apan wala gayúd niya buhii ang pransiskano nga nanglimbasug ug nagsamot ug lugnot bisan wala siyáy nakuha.
-Ang akong kasingkasing malinawon uyamut, ang akong kamót wala magakuróg...
Ug tapus motan-aw sa nanaglibot kaniya, miingon:
Una sa tanan, aduna bay usá kaninyo nga wala mahagugma sa iyang amahan, nga walà magamahal sa iyang handumanan, usà ka binuhat nga natawo taliwala sa kaulawan?...
-Nakita mo? Nakita mó nga ang tanan mihilum? Tinugyanan sa usa ka Bathala sa kalinaw, pari kansáng babà walay laing ginayamyam kon dili ang tinuhoan ug mga maayong buhat apan kansang kasingkasing puno sa tanang kahugawan, ikáw, ikaw walà dagway makailà kon unsá ang usa ka amahán, kay nakahunahuna ka untà sa imoha! -Nakita mo? Taliwala nianang mga tawo nga imong gitamay walay usà nga sama kanimo! Gihukman na ikaw!
Ang mga tawo nga naminaw kang Ibarra, sa pagkasabút nga ang batan-on may tuyo sa pagpatay sa pari, nanglihok ug nanghana pag-uláng.
-Palayo kamo! -mibalik pagsinggit ang batan-on sa tingog nga makahahadlok. -Kay ngano? Nangahadlok ba kamo nga ang akong kamót mabuling sa dugo nga mahugaw? Wala ko bá kamo ingnà nga ang akong kasingkasing malinawon uya-
