Page:Mga Binalaybay V.3.pdf/65

57

Sila dira tagoa, kailo kong’ binalaybay,

Mga anak nga sinubol nga nagsuyop sang kagha:

Ila nasayran sad-in gikan ilang’ kabuhi

Kag ayhan sila sa inyo masugid man sina.

"Agusto 22, 1883.

__________

AMBAHAN SA PANGABUDLAY⁽¹⁾

__________

Dulongan

Tungod sa banwa sa inaway,

Tungod sa banwa sa hidait,

Ang pilipinhon mabantay,

Mabuhi kag mapatay!

★ ★ ★ ★ ★

Mga Lalake:

Nian ang Sidlangan may duag sang kasanag,

Sus! mangabudlay na sa dutang’ ulomhan,

Kay ang pangabudlay sang tawo gasakdag

Sa panimalay, pungsod kag puloy-an.

Ayhan may katig-a ang duta sa uma;

Kay nagatagiti ang silak sang adlaw. . .

Sa pungsod, asawa, kag sa kabataan

Ang tanan matigayon sa aton paghigugma!

Dulongan

★ ★ ★ ★ ★

Mga Asawa:

Lakat masadya sa hilikuton,

Huptan sang asawa sing maayo’ng puloy-an,

Nga sang paghigugma, tudloan ang anak,

Sa pungsod, katarong kag mga kinaalam.

Kon sang gab-i dal-on tion sang pagpahuway,

Bantayan kamo sang palad pagsugod;

Kon ang kapalaran sawi, ang asawa

Amo’ng magpadayon sang mga paghugod.

Dulongan

______

(1) Suno sa tig-ulo, isa ini ka ambahan, nga ang iya tulalay wala mahibal-i. Wala mahibal-i kon san-o ini sinulat ni Rizal. Naggwa ini sa mga binalaybay nga tinipon ni Dn. Jayme de Veyra, kag subong man sa "Rizal as Economist and Educator” ni Ocampo kag iban pa.

"Wala malakip sa sinulatan ni Retana nahanungod kay Rizal bisan sa iya ni Palma.”

“Ginatuohan nga sinulat ini tuhoy sa banwa sang Lipa, Batangas.” —L. Lopez-Rizal.