This page has been proofread.
- Kag iya nga ginpaanggid ang karon nga kalautan
- Sa mga sumponganay sang nagligad nga inadlaw,
- "Paalam, Alhambra, - siling 'ya; Paalam, Alhambra,
- Palasyo sang patuyang kag himayang' dagaya;
- Paalam, palasyong' puno sang mga kalipayan,
- Busay nga dimahubsan sang mga katam-isan.
- Masubo tang' bayaan kag ako malakat
- Sa talapukang' mapintas nga puno'y kalapyo,
- Agud di ko makita mga toreng' mataas,
- Mga busay mong' matin-aw, manggaran nga puloy-an."
- Siling niya; nagnguyngoy, malahalon yang' bayu
- Sa bulawanong' hulot iya nga hinukas;
- Sang mga matahum yang' hiyas nakuhaan
- Ang dalagkong' kadak-an masubong' binayaan,
- Sa tunga sang kahipos sadto nga kagab-ihon
- Samtang mga kailo nga arabe nagtululog,
- Samtang ang hagong lamang sang mga kahanginan
- Sa siudad nga mahipos amo'ng mabatian;
- KAG iya linaktod ang mga dalan
- Sadto'ng ginharian nga wala'y tawo.
- Sa balhas niya nabasa sia kaayo
- Maluspad nga nabilin kag gatiskog;
- Ang pagginhawa lamang nga madalum
- Bisan diin ang sarang mabatian
- Kag isang tingog nga may kasakitan
- Nga nagtiyabaw sing makahalagnop.
- DUMULOG sia; tinulok mga tore;
- Mga pamakod iya nalantawan,
- Ang inaway iya nadumdoman
- Nga sa iya panahon iya nahimo;
- Apang sa iya di sia makapugong
- Kag tinamod ya'ng panulok sa duta
- Kag naghambal nga may tuman nga kagha
- Nga pinadunglay ang iya tangkugo:
- Ay! ano'ng natabo sa imo, Granada?
- Naano'ng imo nga mga kabalyero?
- Ay! diin ang mga hangaway nimo,
- Nga'ng imo kagha di nila nakit-an?
- Huo! ako, Hari mong' kinuhaan
- Sing kalipay, sa libika nga duta
- Tinabog, may mga talikala
- Sa kapalaran ako mabuylog man.
