Page:Mga Binalaybay V.3.pdf/13

5

Madumdoman ko’ng kubos nga banwa,

Kalipay ko, himaya kag duyan,

Sa luyo sang mabugnaw nga linaw

Nga duog sang akon mga handum.

----------

O, kon ang tiil kong’ dili pat-od

Magtapak sa talon mong’ maharon,

Kag sang suba mo, sa panghigaron

Akon makita’ng kalingawan;

Sa simbahan ako mangamuyo

Bata, nga may diutay nga pagtuo

Kag ang hangin mong’ putling’ tutuo

Naghatag kalipay sa akon dughan.

----------

NAKITA ko’ng Tagtuga sa sangkad

Sang dumaan mo nga kagulangan;

Sa sabak nimo ang kalisdanan

Wala gid nakon mabatyagi;

Samtang ang asul nimo nga langit

Gintangla ko, ang gugma kag angga

Wa’y kulang, kay sa Tinuga yara

Ang akon kalipay nga labi.

----------

PAGKABATANG’ luming, banwang’ maanyag

Dagayang’ tuboran sang kalipay,

Sang matam-ison nga mga laylay,

Nga nagatabog sang kalisod!

Pagbalik sa akon tagipusuon,

Pagbalik tinakna kong’ bulahan

Subong pagbalik sang kapispisan

Pagpamuskag sang mga bukad!

----------

APANG, paalam! Magbantay gihapon

Sang imo hidait, kalipayan,

Ang Diwa sang kaayo, mga may kaalwan

Nagahatag sang iya bugay;

Sa imo’ng paghangad ko nga mainit

Sa imo’ng dalayon kong’ mga handum

Pag-alam, kag sang langit ipaagum

Kaputli mo’y dayon mag-unay!

----------