— 66 —
nikünos su vol, e jigam leodik viena mutof nolön osi.»
E vien äbeginom bladön; balüdo melodis lovik milagasvidik, in kels flols äbenotonoms, täno aikleiliko e aimeköfiko; gifabluk lefäloköl ämigom ino yubiko vögi oka; e läto älemänom in tons subimik jönik so meköfiko, so mekadiko, das bims gletikün, äbiegoms dibiko.
Ab Hilda smalik ästanof fimiko, ägälof oki kanita magifik, kel nu ätonom lovikumo e lovikumo, e äfetonodom fino moliko.
Täno vien äkidom ofi su flom, äpledom ko hel ofa e änemom ofi jigam löfik svidik oma.
E Hilda äblibof ko om; ägetof vienabakis e vienakeki so mödik äs ävilof fidön. — Täno älenadof bladön e suno änolof osi gudikumo ka vien; e nog adelo, ven stomos meköfiko e tepos seo, mens sagoms «vienajigam kömof», e kikoms litamis.
Lovepol fa Devidé Tadäüs* (Löstän).
BERAYAG.
(Alex Dumas.)
Guillaume Mona äbinom feilel pöfik se pag Fouly lä Martigny.
Ber sembal äkömom sifön, bünis omik neits valik, ibo nimes et valikos binos gudik. Äbizugom yedo visitön bünabimi pelodöl ko büns flukatimik. Kim äblesenomöv, das nim somik labom, äslik men, smeki feinik, e das sevälom in pomagad bünis svidikün? Ab neläbo feilel de Fouly äbizugom i bünis flukatimik bufu fluks valik gada omik. Äniludom begino, das cils äkömoms dämön gadi omik; sikod äsumom güni omik, älodom omi ko kukasal, e ägolom lükön. Za düp balsebalid älilom gluvoki in belem. «Ö, äsagom, ber sembal stebom
