— 25 —
nom lefulik; jireg Isabella äbinöl in lojöp, äpölüdof ni vödi, ni mufami, ni logimi damatelas ed ämanifof milagami ofa, dub sevoks. Del suköl ädamatelob «Maria Stuart» e kilidno «Myrrha». Telsebalid äsötob denugivön «Medea» e vendeli at otögetob nevelo, so dibiko zid sembal peninpedom tikäle e lade oba.
Düp kösömik ägolob in teati. Büfo rivön klotönacemi ämutob dagolön musamasäli jönik. Du jidünan oba äplepalof zesüdikosi al votaklotön, ämusamob ko damatels votik dö glol e jön de Madrid e dö südods selednik difik oma. Abö! äsagob, kisi malom glökil, keli äiglökom in süt man neduto lönöl kobledefe sembal? Ägepükon, das man at konletom limuni al dalivön lani pekodemela al deil, kel äsötom zitön odelo. Pekodemel panemon Nicolas Chapado. Äbinom solat, kel in vut demü flap, keli ägetom fa disafizir, izugom säbi ta ot. Fälo älilob, das jiblod neläbikela at, kel äsevof nosi dö zit at, ägivof limuni konletele koblodefa de St. Johannes ed esäkof: kim binom pekodemel plo kel pakonletos? «Nicolas Chapado» gepük ätonom e foviko jipul, lilöl atosi, äfalof pelivöl de siens. Kon at ämekom obi lügik vemo. Godö! äsevokob, du is musamobs e valadobs läsevi e levikodi, pekodemel et numom minutis kelis labom nog al lifön! Glumik ägolob in klotönacemi. Pos minuts nemödik pösods tel äbegoms däli al pükön obi. «Läd Ristori lenu klotof oki» äbinom gepük. Ye ats ädlanoms sovemo, das äletob omis nitlidön. Äbegoms obi al libön Nicolas Chapado, lesagöls das lib oma äbinom in nams obik. «Lif pekodemela deslopom de ben jirega; if ubegol ofi, ben ovedom!» — «Ab jireg», äsevokob, ocedof obi niludälik, bi kisi völadob lo ets, kels zelado äplopükoms ya gönü neläbikel? Tos kodü lebegs denuamik äpömetob atosi kinön. Ab lenu fikul nulik
