ma Tawi en ma Intonesija la ma Malasija li lon insa. ona li jo e kipisi[1] pi ma Ponejo (Borneo) kin li lon poka pi linja pi meso[2] ma. tan ni la ona li ma seli. ona li jo e tenpo tu taso pi tenpo sike: tenpo seli en tenpo telo. ma tomo lawa pi ma Malasija li ma tomo Kuwala Lunpu. ma tomo ni li jo e kipisi pi tenpo pini, taso suli la ona li ma tomo sin li jo e tomo palisa suli mute.
ma Malasija li pona tawa mi tan ni: jan pi ma ni li pona. en la ijo pona mute li lon. ijo wan pi pona mute li kule. kulupu jan en toki en nasin pi tenpo pini en nasin sewi mute li lon. jan Male en jan Sonko en jan Palata en jan pi kasi suli pi telo tawa li lon. nasin sewi Silami li nasin sewi nanpa wan. taso nasin sewi Puta en nasin sewi Palata kin li lon. jan pi ma Malasija li toki e toki Male e toki Inli. taso jan pi kulupu Sonko li toki e toki Sonko kin. jan pi kulupu Palata li toki e toki Tami (Tamil) kin.
ma ni li jo e ijo mute pi pona lukin. ma lili pi insa telo suli en ma kasi suli pi telo sewi en ma tomo pi tenpo pini li lon. mi la ma tomo pona nanpa wan pi tenpo pini li tu: wan li ma tomo Jositan (Georgetown). wan ante li ma tomo Melaka. ma tomo ni li epiku[3] a! ona li jo e tomo mute pi tenpo pini e kipisi Sonko e kipisi Male e kipisi Palata e kipisi Inli (tenpo pini la ma Malasijia li ma weka pi ma Juke. ma Juke li jo e ma Malasija). kipisi Sonko pi ma tomo tu ni li pona li suli nanpa wan. tomo pi nasin sewi mute kin li lon. tomo pi nasin sewi Puta pi nasin sewi Sonko pi nasin sewi Silami pi nasin sewi Palata pi nasin sewi Kolisu li lon. ona li sinpin pi pilin pona pi nasin ante. ni li pona mute mute a!
nasin kulupu mute li lon, la moku ante mute li lon a! lon ale la jan li ken moku e moku Sonko e moku Male e moku Palata e moku ante. ken la moku nanpa wan pi ma Malasija li moku Nasilema (nasi lemak). ona li pan walo li kasi palisa pi jelo laso li kili kiwen lili li kala lili pi telo ala li sike mama li ko namako. ona li pona mute a, taso ona li seli lili e uta. sina ken kama lon ma Malasija, la lili lili la o tawa lukin e ma ni: ma tomo Jositan, ma tomo Melaka, ma lili Pejensijan (Perhentian), ma kasi suli Taman Nekawa (Taman Negara). kin la ante mute li lon. kin la o lukin moku e moku pi kule mute pi ma ni a! suli la o sona weka ala e ni: o moku e moku Nasilema!
- ↑ "kipisi" pi ijo li ijo lili pi ijo suli
- ↑ "meso" li pona ala, li ike ala, li lon insa pi ona tu.
- ↑ "epiku" li "pona mute a"
