kalama ma li kama ala kama e ma?
jan Ke Tami
sina lukin e toki mi ni la, sina ken pilin e ni: ma li lon. ona li ante ala, li lon tenpo ni, li lon tenpo pini, li lon tenpo kama. ona li weka ala tan noka mi. taso ma li ante, li ante mute lon tenpo.
o sona e ni: tenpo mun pini tu la... ma sin li kama lon!
taso ni li ken tan seme? a, insa pi sike suli ma li seli suli a. seli li pali e ni: kiwen li kama ko seli, li kama telo pi seli suli. kiwen telo seli ni li ken tawa, li ken wawa. tenpo la, ona li ken pakala e anpa ma, li ken tawa sewi kepeken wawa mute, li kalama suli, li ken pana e kon pimeja, li ken tawa e kiwen lili e kiwen suli lon supa ma kepeken tawa wawa. jan li lon ma ni la, ni li ken ike mute, li ken moli mute tawa jan, li ken pakala e ijo ale ona. tenpo mute mute la, nena li lon tan ni. nena ni la, kalama sin en pakala seli sin li ken kama.
nena seli ni mute li lon. nena seli Pukutoku-Okanopa (Fukutoku-Okanoba) li lon insa pi telo suli, li weka lili tan ma Nijon. tenpo pini la, telo li len e ona. ni la, jan ala li lon. taso tenpo mun pini tu la, ona li kalama, li pana e kon pimeja. kon pimeja li ken pakala e ilo tawa lon sewi la tomo tawa sewi mute li ken ala tawa sewi. kulupu pi lawa telo li tawa ona, li lukin e ona la, ona li kama lukin e ni: ma sin li lon a!
tenpo sike pini mute la, nena seli ni li kalama. tenpo pini tu la, ma sin li kama taso ma ni li awen ala, li kama weka tan wawa pi telo suli tan tawa pi telo suli. ma sin pi tenpo ni li awen ala awen? mi sona ala. taso mi ken toki e musi ni:
ma ala la, kalama ma li kama ala kama e kala? ala! kalama ma la, ma ala li kama ma.
ma
tawa pi poki monsi pi ma Asija: nanpa wan. ma Malasija
jan Polo
mi jan pi ma Italija, taso mi awen li pali lon ma Asija lon tenpo sike luka luka luka. ma Asija li pona mute tawa mi. jan en sona kulupu en nasin lon en nasin sewi pi kama suno li pona mute tawa mi. lon tenpo ni la mi tawa mute lon ma mute. mi tawa lon ma Malasija lon ma Pulune (Brunei) lon ma Sinkapo lon ma Intonesija lon ma Pilipina lon ma Mijama lon ma Tawi lon ma Laso (Laos) lon ma Kanpusi lon ma Wije lon ma Sonko lon ma Onkon lon ma Omun (Macao) lon ma Anku lon ma Nijon lon ma Palata lon ma Nepa lon ma Lanka. tan nanpa ni pi lipu tenpo la mi wile toki lili lon ma ale ni. mi wile e ni: sina tawa lili lon poka mi. mi wile open tan ma Malasija tan ni: tenpo ni la mi awen li pali lon ma ni.
