चालू अवस्था हें सगळें जमेक धरता. अशेतरेन श्रेणीची दर एक पातळी फुडले सकयले पातळे क्रियांचेर सेवा – नियंत्रक म्हणून कार्य करता आनी आपल्या उद्दिश्टांप्रमाण निश्र्चीत केल्ल्यो घटनांचो अवस्था आनी चालू घटनांच्यो अवस्था हातुंतलो फरक उणो करपाचे नदरेन सकयले पातळेक आज्ञा दिता. अशो प्रणाली संवेदना आंतरक्रियाशील आसून मानवी तंत्रिका तंत्रांतल्या (मज्जासंस्थेंतल्या) जायत्या कार्यांसारकी नियुक्तर्काय पृथक्करण करपी श्रेणीय रचना हांचो तांतून आस्पाव आसता. हे प्रणालीक लागून उच्चतम पातळेचेर उद्दिश्ट निश्र्चीत करपी सामक्या, सर्वसादारण आज्ञांच्या आदारान रोबॉटाक सुचोवण्यो दिवपाक येतात.
सामन्वय : रोबॉटाचे गतीच्या नियंत्रणाच्या वेगवेळ्या पातळ्यांनी फरक करपाची एक पद्दत म्हळ्यार तांचे भाग गतिमान आसतना तांचेभितर जावपी समन्वयाचें प्रमाण मतींत घेवप.
कार्यक्रमणाच्या मूलभूत भाशांपसून तयार जाल्ले वेगवेगळे प्रकार लक्षांत घेतल्यार रोबॉट कार्यक्रमणाचो सुमार 20 भासो आसून तांच्यांत आनिकय भर पडत आसा. तशेंच सद्या – वापरांत आशिल्ले चडशे रोबॉट कार्यक्रमण भाशा सुव्यक्त आसात. म्हणजेच तांतुतल्यो सुचोवण्यो रोबॉटाक सरळ क्रिया करपाचे आज्ञेच्या स्वरुपाच्यो आसतात. सद्याच्या कार्यक्रमण भाशांनी तपशीलवार सुचवण्यो अचूक वाक्यरचना करून दिवंच्यो पडटात. पूण फुडाराक कार्यक्रमण करपाखातीर रोबॉटाकडेन उंचेले पातळेची बुद्दीमत्ता आसप गरजेचें आसतलें.
उंचेल्या स्तरावयल्या रोबॉट कार्यक्रमणाची भास विकसीत करपाचें कार्य जायतीं विद्यापिठां, रोबॉट उत्पादक आनी कांय देशांचीं शासना करीत आसात. ह्यो भासो तशेंच तोंडी आज्ञा आनी जायत्या वेगवेळ्या संवेदकांपसून मेळपी संकेत संयोगान परिणामकारकपणान सुरक्षीतपणान कार्य करपाक शकपी रोबॉट निर्माण करपाक येतले.
रोबॉटापसून जायते फायदे आनी नुकसानूय जाता. धोक्याच्या कामांपसून रोबॉट मनशाची सुटका करपाक शकता. मनशाक बुरशीं, वाजेवणी आनी उणेपणचीं दिसपी कामां रोबॉट करपाक शकता. जड वस्तू ते सतत उखलपाक शकतात. तशेंच ते सामके ल्हान, नाजूक भाग तांकां अपाय करीनासतना हाताळपाक शकतात.
राखणदार उजो आनी घरफोडी हांचे धोकासूचक, परिक्षक आनी संनियंत्रक म्हणून ते कठोरपणान, विश्र्वासूपणान आनी विसव घेनासतना काम करपाक शकतात. मनशांपरस ते उणे खर्चीक आसतात. तांकां सोंपेपणीं आनी बेगीन प्रशिक्षण दिवपाक येता आनी बदलपी गरजांप्रमाण लवचिक आनी फावो अशें जावपाखाततीर परत प्रशिक्षण दिवं येता. कसलेंय काम केले उपरांत ते दुसऱ्या कामाखातीर वापरपाक येतात. तांच्या उपेगाचेर फकत तांचो वापर करपी गरजो आनी कल्पनाशक्ती हांकां लागुनूच मर्यादा येवपाक शकतात. जशें माक्नान लोकांच्या कामाचेर आनी पर्यायान दिसवड्याचेर हावळ हाडली, तेचभाशेन रोबॉटाक लागून कांय खाशेल्या मळांचेर बेकारी निर्माण जांव येता म्हणपाचे धोको दिसता. मशिनांच्या आदारान उद्देगधंद्यांनी वाड जावन, चडांत चड लोकांक, पारंपारीक पद्दती भायलें काम मेळूंक पावलें तशें रोबॉटाक लागुनूय, वेगळे तरेच्या कामाखातीर चड लोकांची गरज पडूं येता.
एका अदमासाप्रमाण जगांतल्या उद्देगीक रोबॉटांचो आंकडो 1981त सु. 23,000 आशिल्लो. हातुंतले 14,000 जपानांत; 5,000 अमेरिकेंत आनी 4,000 अ. युरेपांत आशिल्लें, अमेरिकेंतल्या रोबॉटांतलें सु. 80%, धातुकाम उद्देगांत वापरताले सु. 30% स कंपन्यांकडेन आशिल्लें आनी तातुंतल्यो तीन कंपन्यो मोटारींच्यो उद्देगांतल्यो आशिल्ल्यो.
भारतांत मुंबयच्या मेकेलॉनिक वॅल्डर्स हे खाजगी मळावयले कंपनीन मुखेलपणान वितळ जोडकामाखातीर उपेगी असो द्रवीय – चलीत रोबॉट 1982च्या अदमासाक तयार केलो. भारत इलॅक्ट्रॉनिक्स भौशीक क्षेत्रांतले कंपनीन दूरचित्रवाणींतल चित्रनलिकांचे जुळोवणे खातीर ‘उखलपी दवरपी’ प्रकारचो आनी सुक्ष्म प्रक्रियकाच्या आदारान नियंत्रीत केल्लो रोबॉट तयार केलो.
मुबंय इलॅक्ट्रॉन्यूमॅटिक्स अँड हायड्रॉलिक्स (इंडिया) हे खाजगी मळावयले कंपनीन द्रवीय आनी विद्युत् शक्तीचेर चलपी वेगवेगळ्या कामांखातीर उपेगी अशे रोबॉट तयार केल्ले आसात. हांचेभायर हिंदुस्थान मशीन टुलस (बेंगळूर), जयहिंद सायाकी (चिंचवड, पुणे) आनी सिफ्लॅक्स ऑटोमेशन अँड रोबॉटिक्स कंपनी (मद्रास) ह्यो कंपन्यो वेगवेगळ्या प्रकारांचे रोबॉट तयार करतात.
-कों. वि. सं. मं.
रोम : इटली देशाची राजधानी आनी संवसारांत इतिहासिक प्रसिददी लाबिल्ल्या शारांभितरलें एक व्हडलें शार. तशेंच सुमार दोन हजार वर्सावयर एक खाशेली संस्कृताय जतन करून दवरपी एक म्हत्वाचें केंद्र. ताच्या दीर्घ इतिहासाक लागून रोम शाराक ‘इटरनल सिटी’ म्हळ्यार ‘सासणाचें शार’ म्हळां. थंयचें आदीम स्मारक, भव्य इगर्जो आनी राजभवन हें सगळें रोम शाराची पुर्विल्ल्या काळांत चडशा अस्तंती देशांचेर आपलो शेक गाजयलो. शेंकड्यांनी वर्सां रोम हें युरोप, उत्तर आफ्रिका आनी अस्तंत आशिया हांचें अधिकार क्षेत्र आशिल्लें. वास्तूशिल्प , राज्यकारभार, भास आनी कायदो हांच्यांतल्यान पुर्विल्ल्या रोमाचो प्रभाव आजुनूय दिसता. वॅटिकन शारांत रोमन कॅथलीक धर्माचो सर्वोच्च धर्मगुरू, पोपाचो राबितो हांगा आशिल्ल्यान,
