꧋ꦯꦼꦩꦂ꧇ꦥꦤꦼꦩꦸꦩꦸꦏꦁꦩꦁꦏꦺꦴꦤꦺꦴꦏꦸꦮꦶ꧈ꦲꦏꦸꦩꦸꦭꦲꦁꦒꦼꦱꦶꦤ꧀ꦧꦔꦼꦠ꧀꧉ꦩꦸꦁꦒꦸꦃꦥꦶꦠꦏꦺꦴꦤ꧀ꦩꦸ꧇ꦏꦥꦿꦶꦪꦺꦲꦸꦥꦩꦤꦺꦱꦶꦁꦩꦺꦴꦠꦁꦔꦏꦺꦲꦺꦴꦫꦢꦸꦮꦺꦧꦸꦏ꧀ꦠꦶꦭꦶꦪꦤꦺꦧꦧꦂꦥꦶꦱꦤ꧀꧈ꦏꦸꦮꦶꦥꦔꦂꦱꦤ꧀ꦤꦶꦁꦥꦔꦢꦶꦭ꧀ꦭꦤ꧀ꦧꦶꦱꦩꦸꦠꦸꦱ꧀ꦱꦫꦤꦚꦸꦩ꧀ꦥꦃꦱꦭꦃꦱꦶꦗꦶ꧈ꦲꦥꦱꦶꦁꦩꦺꦴꦠꦁꦔꦏꦺ꧈ꦲꦥꦱꦶꦁꦲꦸꦠꦁ꧉ꦥꦩꦶꦭꦶꦃꦲꦺꦱꦥꦱꦶꦁꦏꦸꦢꦸꦢꦶꦱꦸꦩ꧀ꦥꦃꦏꦸꦮꦶ꧈ꦒꦸꦩꦤ꧀ꦠꦸꦁꦩꦫꦁꦏꦂꦱꦤꦶꦁꦥꦔꦂꦱꦤꦶꦁꦥꦔꦢꦶꦭ꧀ꦭꦤ꧀꧉ꦮꦶꦱ꧀ꦠꦼꦩ꧀ꦠꦸꦱꦶꦁꦢꦶꦱꦸꦩ꧀ꦥꦃꦏꦸꦮꦶꦱꦭꦃꦱꦶꦗꦶꦱꦶꦁꦏꦶꦫꦏꦶꦫꦏꦼꦤꦢꦶꦥꦶꦠꦪ꧉ꦭꦸꦩꦿꦃꦲꦺꦱꦶꦁꦢꦶꦱꦸꦩ꧀ꦥꦃꦏꦸꦮꦶꦮꦺꦴꦁꦱꦶꦁꦲꦁꦒꦸꦒꦠ꧀ꦥꦿꦏꦫ꧉ꦲꦶꦁꦠꦼꦩ꧀ꦧꦺꦪꦺꦤ꧀ꦏꦱꦸꦩꦸꦫꦸꦥ꧀ꦥꦤ꧀꧈ꦩꦤꦮꦱꦶꦁꦢꦶꦱꦸꦩ꧀ꦥꦃꦩꦲꦸꦱꦸꦩ꧀ꦥꦃꦲꦺꦥꦭ꧀ꦱꦸ꧈ꦩꦶꦠꦸꦫꦸꦠ꧀ꦲꦂꦠꦶꦏꦼꦭ꧀ 159 ꧈161 ꦭꦤ꧀ꦲꦂꦠꦶꦏꦼꦭ꧀ 162ꦲꦶꦁꦲꦁꦒꦼꦂꦥꦿꦶꦧꦸꦩꦶ(Ind. Regl.)ꦮꦺꦴꦁꦩꦲꦸꦏꦼꦤꦢꦶꦪꦸꦏꦸꦩ꧀ꦩꦏꦺ꧉
꧋ꦓꦫꦺꦁ꧇ꦭ꧈ꦪꦺꦤ꧀ꦩꦁꦏꦺꦴꦤꦺꦴꦭꦫꦱ꧀ꦱꦺ꧈ꦫꦩ꧈ꦱꦶꦁꦲꦸꦠꦁ꧈ꦲꦸꦥꦩꦤꦺꦲꦶꦁꦏꦺꦤꦺꦱꦶꦦꦺꦠꦿꦸꦏ꧀꧈ꦲꦥꦲꦺꦴꦫꦧꦶꦱꦚꦸꦮꦸꦤ꧀ꦩꦫꦁꦥꦔꦂꦱꦤꦶꦁꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀꧈ꦱꦸꦥꦪꦱꦶꦁꦩꦺꦴꦠꦁꦔꦏꦺꦩꦲꦸꦢꦶꦱꦸꦩ꧀ꦥꦃ꧉
꧋ꦯꦼꦩꦂ꧇ꦭꦺꦴ꧈ꦲꦏꦸꦩꦲꦸꦮꦶꦱ꧀ꦔꦺꦴꦩꦺꦴꦁ꧈ꦱꦶꦁꦢꦶꦱꦸꦩ꧀ꦥꦃꦏꦸꦮꦶꦱꦶꦁꦲꦏꦺꦃꦲꦏꦺꦃꦱꦶꦁꦒꦸꦒꦠ꧀ꦥꦿꦏꦫ꧈ꦢꦢꦶꦭꦸꦩꦿꦃꦲꦺꦪꦱꦶꦁꦩꦺꦴꦠꦁꦔꦏꦺ꧉
꧋ꦓꦫꦺꦁ꧇ꦧꦼꦤꦼꦂ꧈ꦩ꧈ꦲꦤꦔꦶꦁꦥꦚꦸꦩ꧀ꦥꦃꦲꦺꦩꦲꦸꦏꦸꦢꦸꦩꦁꦏꦺꦤꦺ꧇ꦩꦸꦭꦪꦱꦧꦼꦤꦼꦂꦧꦼꦤꦼꦂꦫꦺ꧈ꦪꦺꦤ꧀ꦱꦶꦯꦸꦠꦩꦺꦴꦠꦁꦔꦏꦺꦝꦸꦮꦶꦠ꧀ꦩꦫꦁꦱꦶꦦꦺꦠꦿꦸꦏ꧀ f. 100.-.
꧋ꦯꦼꦩꦂ꧇ꦭꦏꦸꦮꦶꦲꦼꦩ꧀ꦧꦸꦃꦲꦺꦴꦫꦮꦼꦫꦸꦃ꧈ꦲꦥꦱꦶꦁꦲꦸꦠꦁꦝꦸꦮꦶꦏ꧀ꦏꦼꦤꦢꦸꦮꦺꦤ꧀ꦤꦶꦥꦤꦸꦮꦸꦤ꧀ꦤꦤ꧀ꦏꦁꦩꦁꦏꦺꦴꦤꦺꦴꦏꦸꦮꦶ꧈ꦏꦶꦫꦏꦸꦏꦼꦤ꧈ꦲꦤꦔꦶꦁꦲꦏꦸꦲꦺꦴꦫꦧꦶꦱꦤꦼꦩ꧀ꦠꦺꦴꦑꦏꦺ꧈ꦲꦩꦂꦒꦪꦺꦤ꧀ꦢꦢꦶꦥꦿꦺꦱꦶꦝꦺꦤ꧀ꦤꦶꦁꦥꦏꦸꦩ꧀ꦥꦸꦭ꧀ꦭꦤ꧀ꦲꦗꦂꦗꦺꦴꦒꦺꦢ꧀ꦲꦏꦸꦪꦮꦶꦱ꧀ꦠꦲꦸ꧈ꦲꦤꦔꦶꦁꦥꦿꦺꦱꦶꦝꦺꦤ꧀ꦤꦶꦁꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀꧈ꦢꦸꦫꦸꦁ꧉ꦭꦺꦴꦏꦥꦿꦶꦪꦺꦏꦉꦥ꧀ꦩꦸꦏꦸꦮꦶꦠꦫꦺꦁ꧈ꦱꦗꦏ꧀ꦏꦺꦏꦺꦴꦏ꧀ꦲꦤꦧꦸꦤ꧀ꦠꦸꦠ꧀ꦠꦺ꧉
꧋ꦓꦫꦺꦁ꧇ꦭꦺꦴ꧈ꦏꦸꦮꦶꦩꦁꦏꦺꦤꦺ꧉ꦫꦩꦩꦲꦸꦮꦶꦱ꧀ꦔꦤ꧀ꦢꦶꦑꦏꦺ꧈ꦱꦶꦁꦱꦥꦱꦸꦩ꧀ꦥꦃꦥꦭ꧀ꦱꦸ꧈ꦩꦶꦠꦸꦫꦸꦠ꧀ꦲꦂꦠꦶꦏꦼꦭ꧀ꦲꦂꦠꦶꦏꦼꦭ꧀ 159꧈ 161 ꦭꦤ꧀ 162 ꦲꦶꦁꦲꦁꦒꦼꦂꦥꦿꦶꦧꦸꦩꦶ꧈ꦏꦸꦮꦶꦏꦼꦤꦢꦶꦪꦸꦏꦸꦩ꧀ꦩꦏꦺ꧉ꦲꦶꦁꦩꦺꦴꦁꦏꦠꦶꦤ꧀ꦢꦏ꧀ꦏꦶꦁꦭꦶꦤ꧀ꦠꦃꦝꦫꦠ꧀ꦏꦸꦮꦶꦭꦸꦩꦿꦃꦲꦺꦪꦺꦤ꧀ꦚꦁꦭꦪꦁꦥꦤꦒꦶꦃꦲꦤ꧀ꦤꦺꦢꦶꦱꦼꦧꦸꦠ꧀ꦠꦏꦺꦩꦺꦴꦠꦁꦔꦏꦺꦝꦸꦮꦶꦠ꧀ f 100,-꧈ꦭꦸꦩꦿꦃꦲꦺꦱꦶꦁꦲꦸꦠꦁꦩꦸꦁꦤꦩ꧀ꦥ f 50,-꧉ꦲꦸꦠꦮ f 60,-꧉ꦱꦲꦶꦏꦶꦪꦺꦤ꧀ꦱꦶꦁꦩꦺꦴꦠꦁꦔꦏꦺꦝꦸꦮꦶꦠ꧀ꦮꦶꦱ꧀ꦏꦭꦏꦺꦴꦤ꧀ꦱꦸꦩ꧀ꦥꦃꦲꦔꦏꦺꦴꦤ꧀ꦤꦶꦩꦺꦴꦠꦁꦔꦏꦺꦝꦸꦮꦶꦠ꧀ f 100,-꧈ꦲꦶꦁꦩꦺꦴꦁꦏꦱꦧꦼꦤꦼꦂꦫꦺꦩꦸꦁꦩꦺꦴꦠꦁꦔꦏꦺ f 50,- ꦲꦸꦠꦮ f 60,-꧈ꦏꦸꦮꦶꦱꦶꦁꦲꦸꦠꦁꦲꦥꦲꦺꦴꦫꦧꦶꦱꦏꦼꦭꦃ꧈ꦪꦺꦤ꧀ꦱꦶꦁꦩꦺꦴꦠꦁꦔꦏꦺꦝꦸꦮꦶꦠ꧀ꦩꦲꦸ꧈ꦮꦶꦱ꧀ꦏꦱꦭꦃꦲꦤ꧀ꦱꦸꦩ꧀ꦥꦃꦥꦭ꧀ꦱꦸ꧉
꧋ꦯꦼꦩꦂ꧇ꦌ꧈ꦱꦩ꧀ꦧꦼꦂꦠꦺꦩ꧀ꦥꦺ꧈ꦏꦛꦶꦏ꧀ꦲꦩꦺꦴꦏꦿꦸꦭ꧀ꦧꦩ꧀ꦧꦸ꧉ꦏꦶꦫꦏꦸꦪꦺꦤ꧀ꦱꦶꦁꦲꦸꦠꦁꦩꦲꦸꦲꦤ꧀ꦢꦸꦮꦺꦤ꧀ꦤꦶꦱꦼꦏ꧀ꦱꦶꦕꦸꦏꦸꦥ꧀꧈ꦥꦤ꧀ꦠꦼꦱ꧀ꦥꦤ꧀ꦠꦼꦱ꧀ꦱꦺꦲꦶꦪꦏꦼꦤ꧈ꦲꦤꦔꦶꦁꦧꦧ꧀ꦏꦸꦮꦶꦲꦏꦸꦲꦺꦴꦫꦧꦶꦱꦲꦩꦼꦱ꧀ꦛꦺꦑꦏꦺ꧉ꦮꦶꦱ꧀꧈ꦱꦩꦺꦤꦺꦝꦶꦱꦶꦏ꧀꧈ꦧꦺꦱꦸꦏ꧀ꦩꦤꦺꦃꦧꦲꦺꦥꦝꦢꦶꦧꦚ꧀ꦗꦸꦂꦫꦏꦺꦲꦁꦒꦺꦴꦤ꧀ꦤꦺꦥꦝꦉꦉꦩ꧀ꦧꦸꦒ꧀ꦒꦤ꧀ꦧꦧ꧀ꦥꦿꦤꦠꦤꦶꦁꦲꦸꦠꦁꦥꦶꦪꦸꦠꦁ꧉
