KRONIEK
꧋ꦏꦧꦂꦮꦂꦤꦶꦮꦂꦤꦶ꧉
꧋ꦥꦼꦛꦶꦏ꧀ꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀꧈
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦠꦶꦠꦶꦪꦁꦲꦶꦁꦝꦸꦱꦸꦤ꧀ ꦑꦮꦠ꧀꧈ꦱꦕꦼꦭꦏ꧀ꦏꦶꦥꦸꦤ꧀ꦮꦡꦼꦱ꧀꧈ꦲꦚꦼꦚ꧀ꦗꦠꦱꦶꦩꦔꦤ꧀ꦠꦺꦴꦱ꧀ꦥꦼꦗꦃ꧈ꦱꦶꦩꦮꦲꦸꦱꦩ꧀ꦥꦸꦤ꧀ꦱꦮꦠꦮꦶꦱ꧀ꦭꦩꦶꦲꦔꦽꦫꦶꦝꦸꦏꦠꦼꦤ꧀ꦠꦽꦩ꧀ꦩꦤ꧀ꦤꦶꦥꦸꦤ꧀ꦝꦸꦱꦸꦤ꧀꧉
꧋ꦏꦧꦂꦫꦶꦥꦸꦤ꧀꧈ꦫꦪꦶꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦏꦁꦗꦼꦁꦯꦸꦭ꧀ꦠꦤ꧀ꦲꦶꦁꦔꦪꦺꦴꦓꦾꦏꦂꦠ꧇ꦧꦤ꧀ꦢꦫꦫꦢꦺꦤ꧀ꦩꦱ꧀ꦯꦸꦗꦤꦢꦶ꧈ꦲꦶꦁꦏꦁꦱꦸꦮꦲꦸꦤꦶꦥꦸꦤ꧀ꦔꦱ꧀ꦠꦥꦢꦩꦼꦭ꧀ꦭꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦤ꧀ꦠꦺꦴꦂꦄꦒꦿꦫꦶꦱꦼꦱꦏꦼꦤ꧀꧈ꦱꦩꦁꦏꦺꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦎꦤ꧀ꦢꦼꦂꦲꦸꦥ꧀ꦲꦶꦁꦏꦤ꧀ꦠꦺꦴꦂꦆꦤ꧀ꦭꦤ꧀ꦱꦼꦏꦝꦱ꧀ꦠꦼꦂꦲꦶꦁꦔꦪꦺꦴꦓꦾ꧉
꧋ꦔꦂꦱꦢꦊꦩ꧀ ꦯꦩ꧀ꦥꦺꦪꦤ꧀ꦣꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦲꦶꦁꦔꦪꦺꦴꦓꦾꦱꦩ꧀ꦥꦸꦤ꧀ꦲꦩꦉꦁꦔꦏꦼꦤ꧀꧈ꦱꦂꦠꦱꦩ꧀ꦥꦸꦤ꧀ꦩꦫꦶꦁꦔꦶꦤꦮꦭꦏꦏꦚ꧀ꦕꦶꦁꦔꦤ꧀ꦝꦠꦼꦁꦥꦤꦸꦮꦸꦤ꧀ꦤꦶꦥꦸꦤ꧀ꦫꦢꦺꦤ꧀ꦮꦢꦤꦢ꧀ꦮꦶꦗꦯꦺꦮꦪ꧈ꦧꦧ꧀ꦚꦸꦮꦸꦤ꧀ꦏꦺꦤ꧀ꦢꦼꦭ꧀ꦲꦁꦒꦺꦤ꧀ꦤꦶꦥꦸꦤ꧀ꦢꦢꦺꦴꦱ꧀ꦲꦧ꧀ꦢꦶꦢꦊꦩ꧀ꦱꦺꦏꦽꦠꦫꦶꦱ꧀ꦲꦶꦁꦏꦢꦶꦦꦠꦺꦤ꧀꧉
꧋ꦱꦏꦶꦁꦯꦸꦫꦏꦂꦠꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦧꦺꦚ꧀ꦗꦶꦁꦮꦸꦭꦤ꧀ꦫꦸꦮꦃꦠꦲꦸꦤ꧀ꦥꦸꦤꦶꦏ꧈ꦏꦥꦉꦁꦔꦶꦁꦏꦂꦱꦢꦊꦩ꧀ꦱꦩ꧀ꦥꦺꦪꦤ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦏꦁꦗꦼꦁꦯꦸꦱꦸꦲꦸꦤ꧀ꦤꦤ꧀꧈ꦥꦸꦠꦿꦶꦢꦊꦩ꧀ꦒꦸꦱ꧀ꦠꦶꦫꦢꦺꦤ꧀ꦲꦪꦸꦯꦼꦏꦂꦏꦝꦠꦺꦴꦤ꧀ꦧꦝꦺꦏꦠꦼꦠꦼꦱ꧀ꦱꦏꦼꦤ꧀꧉
꧋ꦱꦼꦢꦾꦠꦩꦲꦩꦂꦠꦺꦴꦱ꧀ꦱꦏꦼꦤ꧀꧈ꦏꦺꦴꦁꦒꦿꦺꦱ꧀ꦩꦸꦃꦲꦩ꧀ꦩꦢꦶꦪꦃꦧꦺꦚ꧀ꦗꦶꦁꦫꦸꦮꦃꦥꦸꦤꦶꦏ꧈ꦏꦧꦂꦫꦶꦥꦸꦤ꧀ꦧꦝꦺꦚꦸꦫꦸꦃꦲꦶꦥꦫꦱꦂꦗꦤꦆꦱ꧀ꦭꦩ꧀ꦱꦏꦶꦁꦩꦺꦴꦚ꧀ꦕꦥꦿꦗ꧈ꦏꦢꦺꦴꦱ꧀ꦠ꧇ꦱꦏꦶꦁꦩꦼꦯꦶꦂ꧈ꦲꦶꦤ꧀ꦝꦸ꧈ꦡꦸꦂꦏꦶ꧈ꦄꦫꦧ꧀ꦱꦱꦩꦶꦤꦶꦥꦸꦤ꧀꧈ꦥꦸꦤꦥꦩꦭꦶꦃꦲꦶꦁꦲꦶꦤ꧀ꦢꦶꦪꦔꦿꦶꦏꦶ꧈ꦩꦼꦱ꧀ꦛꦶꦏꦱꦸꦫꦸꦃꦲꦤ꧀꧉ꦢꦺꦤꦺꦲꦶꦁꦏꦁꦧꦝꦺꦏꦉꦩ꧀ꦧꦒ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦺꦴꦁꦒꦿꦺꦱ꧀ꦔꦿꦶꦏꦸꦱꦩꦁꦏꦺꦢꦺꦫꦺꦁꦱꦒꦼꦢ꧀ꦲꦤꦼꦩ꧀ꦠꦺꦴꦑꦏꦼꦤ꧀꧉
꧋ꦱꦏꦶꦁꦯꦸꦫꦧꦪꦏꦮꦂꦠꦺꦴꦱ꧀ꦱꦏꦼꦤ꧀꧈ꦠꦸꦮꦤ꧀ ꦩꦂꦯꦸꦢꦶ꧈ꦫꦺꦝꦏ꧀ꦠꦸꦂ Sinar Indonesia ꦱꦂꦠꦲꦶꦁꦏꦁꦢꦺꦫꦺꦁꦢꦔꦸꦥꦸꦤꦶꦏꦔꦼꦢꦼꦒ꧀ꦒꦏꦼꦤ꧀ꦥꦏꦼꦩ꧀ꦥꦭ꧀ꦭꦤ꧀ꦲꦺꦁꦒꦭ꧀ꦤꦩ꧇ꦥꦂꦠꦺꦫꦪꦠ꧀ꦲꦶꦤ꧀ꦝꦺꦴꦤꦺꦱꦶꦪꦃ꧈ꦢꦶꦥꦸꦤ꧀ꦕꦼꦥꦼꦁꦗꦭꦂꦫꦤ꧀ꦢꦩꦼꦭ꧀ꦏꦫꦁꦔꦤ꧀ꦲꦶꦁꦏꦁꦱꦸꦫꦲꦺꦴꦱ꧀ꦱꦶꦥꦸꦤ꧀ꦔꦺꦴꦗꦺꦴꦏ꧀ꦲꦺꦴꦗꦺꦴꦏ꧀ꦏꦶ꧉
꧋ꦱꦊꦧꦼꦠ꧀ꦠꦶꦥꦸꦤ꧀ꦮꦸꦭꦤ꧀ꦱꦺꦥ꧀ꦠꦺꦩ꧀ꦧꦼꦂꦥꦸꦤꦶꦏ꧈ꦠꦶꦠꦶꦪꦁꦱꦏꦶꦠ꧀ꦲꦶꦁꦏꦁꦢꦶꦥꦸꦤ꧀ꦥꦸꦭꦱꦫꦏꦤ꧀ꦛꦶꦭꦭꦲꦤ꧀ꦤꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦱꦏꦶꦠ꧀ ꦡꦾꦺꦴꦁꦲ꧀ꦮ ꦲꦶꦁꦯꦼꦩꦫꦁ꧈ꦲꦶꦁꦒꦶꦃꦥꦸꦤꦶꦏ꧇ꦧꦺꦴꦁꦱ ꦡꦶꦪꦺꦴꦁꦲ꧀ꦮ 243꧈ꦠꦶꦠꦶꦪꦁꦲꦺꦱ꧀ꦠꦿꦶꦧꦺꦴꦁꦱ ꦡꦾꦺꦴꦁꦲ꧀ꦮ 33꧈ꦭꦫꦺꦭꦫꦺ ꦡꦾꦺꦴꦁꦲ꧀ꦮ 154꧈ꦠꦶꦪꦁꦥꦿꦶꦧꦸꦩꦶ 62꧈ꦠꦶꦪꦁꦲꦺꦱ꧀ꦠꦿꦶꦥꦿꦶꦧꦸꦩꦶ 45꧉ꦢꦺꦤꦺꦠꦶꦠꦶꦪꦁꦱꦏꦶꦠ꧀ꦲꦶꦁꦏꦁꦱꦩꦶꦧꦪꦂꦮꦺꦴꦤ꧀ꦠꦼꦤ꧀ 89꧉ꦢꦢꦺꦴꦱ꧀ꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦮꦸꦭꦤ꧀ꦱꦺꦥ꧀ꦠꦺꦩ꧀ꦧꦼꦂꦥꦸꦤꦶꦏ꧈ꦒꦸꦁꦒꦸꦁꦔꦶꦥꦸꦤ꧀ꦠꦶꦠꦶꦪꦁꦲꦶꦁꦏꦁꦱꦩꦶꦢꦶꦥꦸꦤ꧀ꦥꦸꦭꦱꦫꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦱꦏꦶꦠ꧀ꦔꦿꦶꦏꦸꦮꦺꦴꦤ꧀ꦠꦼꦤ꧀꧇ 626꧉
꧋ꦮꦺꦴꦤ꧀ꦠꦼꦤ꧀ꦏꦧꦂ꧈ꦧꦶꦭꦶꦃꦲꦶꦁꦗꦼꦩ꧀ꦧꦼꦂꦠꦤ꧀ꦱꦃꦮꦺꦴꦤ꧀ꦠꦼꦤ꧀ꦗꦮꦃꦲꦮꦸ꧉ꦩꦭꦃꦲꦶꦁꦔꦿꦶꦏꦏꦭꦏꦭꦏꦥꦶꦉꦁꦔꦤ꧀ꦱ꧀ꦮꦫꦒꦸꦩꦸꦫꦸꦃꦱꦏꦶꦁꦉꦢꦶꦫꦲꦸꦁ꧈ꦠꦸꦮꦶꦤ꧀ꦏꦸꦏꦸꦱ꧀ꦱꦶꦁꦏꦮꦃꦉꦢꦶꦮꦲꦸꦠꦤ꧀ꦱꦃꦏꦼꦠꦶꦔꦭ꧀ꦒꦸꦩꦸꦭꦸꦁꦱꦸꦤ꧀ꦝꦸꦭ꧀ꦔꦮꦶꦪꦠ꧀꧉
꧋ꦏꦭꦠꦁꦒꦭ꧀ 19 ꦱꦺꦥ꧀ꦠꦺꦩ꧀ꦧꦼꦂꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦒꦽꦱꦶꦏ꧀꧈ꦲꦤ꧀ꦝꦮꦃꦲꦏꦼꦤ꧀ꦲꦸꦏꦸꦩ꧀ꦩꦤ꧀ꦏꦸꦚ꧀ꦗꦫꦝꦠꦼꦁꦥꦫꦏꦺꦴꦩ꧀ꦩꦸꦤꦶꦱ꧀꧈ꦯꦸꦠꦶꦏ꧀ꦤꦭꦤ꧀ꦩꦸꦃꦲꦩꦢ꧀ ꦡꦩ꧀꧈ꦲꦶꦁꦏꦁꦱꦠꦸꦁꦒꦭ꧀ꦭꦩꦶꦤꦶꦥꦸꦤ꧀ 4½ ꦠꦲꦸꦤ꧀꧈ꦱꦠꦸꦁꦒꦭ꧀ꦭꦶꦥꦸꦤ꧀ꦩꦭꦶꦃ 3 ꦠꦲꦸꦤ꧀꧈ꦲꦩꦂꦒꦶꦏꦊꦥꦠ꧀ꦠꦤ꧀ꦧꦝꦺꦲꦢꦩꦼꦭ꧀ꦫꦶꦱꦏ꧀ꦏꦶꦥꦸꦤ꧀ꦏꦠꦼꦤ꧀ꦠꦽꦩ꧀ꦩꦤ꧀ꦤꦶꦁꦥꦿꦗ꧉
꧋ꦱꦏꦶꦁꦔꦮꦶꦏꦮꦂꦠꦺꦴꦱ꧀ꦱꦏꦼꦤ꧀꧇ꦱꦠꦸꦁꦒꦶꦭ꧀ꦭꦶꦁꦗꦼꦤ꧀ꦝꦸꦭ꧀ꦭꦶꦁꦏꦺꦴꦩ꧀ꦩꦸꦤꦶꦱ꧀ꦤꦩ꧇ꦯꦸꦫꦠ꧀ꦩꦗꦶꦄꦭꦶꦪꦱ꧀ ꦫꦠ꧀ꦩꦤ꧀꧈ꦲꦱ꧀ꦭꦶꦱꦏꦶꦁꦏꦼꦝꦸꦁꦒꦭꦂ꧈ꦲꦶꦁꦏꦁꦢꦢꦺꦴꦱ꧀ꦧꦸꦫꦺꦴꦤ꧀ꦤꦶꦁꦥꦸꦭꦶꦱꦶ꧈ꦲꦩꦂꦒꦶꦏꦊꦥꦠ꧀ꦠꦤ꧀ꦠꦸꦩꦸꦠ꧀ꦠꦸꦩꦸꦠ꧀ꦲꦢꦩꦼꦭ꧀ꦒꦺꦒꦺꦂꦫꦤ꧀ꦢꦺꦫꦺꦁꦢꦔꦸꦥꦸꦤꦶꦏ꧈ꦢꦺꦫꦺꦁꦮꦠꦮꦶꦱ꧀ꦭꦩꦶꦥꦸꦤꦶꦏꦏꦕꦼꦥꦼꦁꦥꦸꦭꦶꦱꦶꦮꦺꦴꦤ꧀ꦠꦼꦤ꧀ꦲꦶꦁꦨꦠꦮꦶ꧈ꦱꦲꦭꦗꦼꦁꦏꦏꦶꦤ꧀ꦠꦸꦤ꧀ꦤꦏꦼꦤ꧀ꦝꦠꦼꦁꦔꦮꦶ꧉ꦱꦢꦸꦩꦸꦒꦶꦤꦶꦥꦸꦤ꧀ꦲꦶꦁꦔꦮꦶꦱꦤꦭꦶꦏꦥꦸꦤꦶꦏꦭꦗꦼꦁꦏꦥꦿꦶꦏ꧀ꦱꦥꦿꦏꦮꦶꦱ꧀ꦱꦶꦥꦸꦤ꧀꧉
꧋ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦮꦢꦤꦄꦊꦩꦺꦤꦼꦥꦸꦭꦶꦱꦶꦲꦶꦁꦥꦫꦺꦱꦶꦝꦺꦤ꧀ꦤꦤ꧀ꦱꦼꦩꦫꦁ꧇ꦫꦢꦺꦤ꧀ ꦯꦸꦏꦂꦩꦤ꧀꧈ꦲꦶꦁꦏꦁꦱꦸꦮꦲꦸꦄꦱꦶꦱ꧀ꦠꦺꦤ꧀ꦮꦢꦤꦥꦸꦭꦶꦱꦶꦏ꧀ꦭꦱ꧀ I ꦲꦶꦁꦯꦼꦩꦫꦁ꧉ꦮꦶꦮꦶꦠ꧀ꦠꦁꦒꦭ꧀ 3 ꦎꦏ꧀ꦠꦺꦴꦧꦼꦂꦥꦸꦤꦶꦏ꧈ꦏꦮꦶꦱꦸꦝꦢꦢꦺꦴꦱ꧀ꦮꦢꦤꦥꦸꦭꦶꦱꦶꦲꦶꦁꦯꦸꦫꦧꦪ꧇ꦩꦱ꧀꧈ꦮꦶꦫꦮꦼꦂꦢꦪ꧈ꦲꦶꦁꦱꦸꦮꦲꦸꦄꦱꦶꦱ꧀ꦠꦺꦤ꧀ꦮꦢꦤꦏ꧀ꦭꦱ꧀ I ꦲꦶꦁꦨꦿꦺꦴꦤ꧀ꦢꦺꦴꦁ꧈ꦏꦧꦸꦥꦠꦺꦤ꧀ꦭꦩꦺꦴꦁꦔꦤ꧀꧉
꧋ꦱꦺꦫꦠ꧀ꦏꦧꦂ A.I.D. ꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦺꦴꦥꦿꦭ꧀ꦧꦺꦴꦁꦱꦦꦿꦶꦧꦸꦩꦶꦭꦤ꧀ꦱꦫꦝꦝꦸꦩꦼꦟꦝꦺꦴ꧈ꦏꦭꦶꦃꦏꦭꦶꦃꦲꦶꦥꦸꦤ꧀ꦱꦩꦶꦒꦺꦴꦭꦺꦴꦁꦔꦤ꧀ꦲꦶꦁꦧꦠꦭꦾꦸꦤ꧀ 15 ꦲꦶꦁꦨꦤ꧀ꦝꦸꦁ꧈ꦢꦺꦫꦺꦁꦢꦔꦸꦥꦸꦤꦶꦏꦏꦕꦼꦥꦼꦁꦲꦶꦁꦥꦸꦭꦶꦱꦶ꧈ꦲꦩꦂꦒꦶꦏꦊꦥꦠ꧀ꦠꦤ꧀ꦲꦁꦒꦺꦤ꧀ꦤꦶꦥꦸꦤ꧀ꦒꦒꦪꦸꦠ꧀ꦠꦤ꧀ꦏꦭꦶꦪꦤ꧀ꦥꦫꦏꦺꦴꦩ꧀ꦩꦸꦤꦶꦱ꧀꧉
꧋ꦱꦏꦶꦁꦡꦼꦒꦭ꧀ꦏꦮꦂꦠꦺꦴꦱ꧀ꦱꦏꦼꦤ꧀꧇ꦏꦭꦢꦶꦤ꧀ꦠꦼꦤ꧀ꦗꦸꦩꦸꦮꦃꦱꦺꦴꦤ꧀ꦠꦼꦤ꧀ꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦗꦩ꧀ꦱꦠꦼꦔꦃꦱꦏꦮꦤ꧀꧈ꦲꦶꦁꦏꦽꦠꦼꦒ꧀ꦱꦗꦮꦶꦤꦶꦁꦏꦶꦛꦡꦼꦒꦭ꧀꧈ꦮꦺꦴꦤ꧀ꦠꦼꦤ꧀ꦲꦶꦁꦩꦂꦒꦶꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦠꦼꦒꦭ꧀ꦭꦤ꧀ꦧꦽꦨꦼꦱ꧀꧈ꦮꦺꦴꦤ꧀ꦠꦼꦤ꧀ꦧꦧꦪꦎꦠꦺꦴꦲꦶꦁꦏꦁꦲꦢꦩꦼꦭ꧀ꦠꦶꦮꦱ꧀ꦱꦶꦥꦸꦤ꧀ꦠꦶꦪꦁꦲꦺꦱ꧀ꦠꦿꦶꦦꦿꦶꦧꦸꦩꦶꦱꦠꦸꦁꦒꦭ꧀꧉ꦏꦭꦏꦥꦿꦶꦏ꧀ꦱꦥꦿꦏꦮꦶꦱ꧀ꦱꦶꦥꦸꦤ꧀ꦠꦼꦠꦺꦭ꧈ꦧꦶꦭꦶꦃꦱꦸꦥꦶꦂꦫꦶꦁꦎꦠꦺꦴꦮꦲꦸ꧈ꦏꦭꦲꦔ꧀ꦭꦩ꧀ꦥꦃꦲꦏꦼꦤ꧀ꦎꦠꦺꦴꦤꦶꦥꦸꦤ꧀ꦔꦤ꧀ꦠꦸꦏ꧀꧉ꦲꦶꦁꦏꦁꦥꦸꦤꦶꦏꦱꦸꦥꦶꦂꦮꦲꦸꦲꦶꦁꦒꦶꦃꦭꦗꦼꦁꦏꦕꦼꦥꦼꦁꦲꦶꦁꦥꦸꦭꦶꦱꦶ꧉ꦠꦶꦪꦁꦲꦺꦱ꧀ꦠꦿꦶꦮꦲꦸꦱꦤꦭꦶꦏꦥꦸꦤꦶꦏꦥꦼꦗꦃ꧉
꧋ꦱꦏꦶꦁꦦꦏꦭꦺꦴꦁꦔꦤ꧀ꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦥꦤ꧀ꦢꦩꦼꦭ꧀ꦭꦶꦥꦸꦤ꧀ꦮꦠꦼꦂꦭꦺꦝꦼꦁ(ꦠꦺꦴꦪꦥ꧀ꦭꦼꦩ꧀ꦥꦼꦁ)ꦲꦶꦁꦡꦼꦒꦭ꧀꧈ꦏꦥꦱꦿꦃꦲꦏꦼꦤ꧀ꦝꦠꦼꦁ firma Snuyff ꦲꦶꦁꦯꦸꦫꦧꦪ꧉ꦮꦿꦒꦢꦶꦥꦸꦤ꧀ f 156.000.-.
