Page:Il chapè a trais pizs.djvu/35

From Wikisource
Jump to navigation Jump to search
This page has not been proofread.

«A non ais ma, chi vagli qui! El vzarò allura, che bel giuvan da bain, chi ais mieu neiv.»

«Tü schi, chi est bella, Frasquita! ....

«Al plesch eau?»

«Scha tü'm pleschast! ..... A non ais duonna scu tü!»

«Ch'El guarda pür, Sigr. Corregidor, quia non ais ünguotta d'postizzi», dschet Duonna Frasquita, fand aint la mangia e mussand al Corregidor sieu bratsch, degn d'üna Caryatide e pü alv cu üna gilgia.

«Quaunt tü'm pleschast! ... proseguit il Corregidor, da di, da not, a tuottas uras, in ogni lö m'impais eau be a te ....»

«Schi cu? Nun plescha a V. S. la Signura Corregidora?» dumandet Duonna Frasquita con üna compaschiun finta, chi avess fat rir ad ün ipoconder. — «Che pcho! Mieu Lucas m'ho dit, ch'el hegia agieu il plaschair da la vair e da la tschantscher, cur el Al cumadet l'ura nell' alcova, e ch'ella saja fich bella, fich buna e d'ün fer fich affabel.»

«Na taunt! Na taunt!» murmuret il Corregidor con üna tschert' amarezza.

«Invece oters m'haun dit», proseguit la mulinera, ch'ella saja fich mela, e vegna fich dschigliusa e cha Vossa Signuria la temma pês cu'l fö.»

«Na taunt!» repetit Don Eugenio de Zuniga y Ponce de Leon, gnand cotschen. «Ne bger, ne poch! Ad ais bain vaira, cha la Signura ho sias manias, — ma a mauncha auncha bger, per as fer tmair. Il Corregidor sun eau?»