Page:Fluors alpinas.djvu/93

From Wikisource
Jump to navigation Jump to search
This page has been proofread.

Nel ester.

Daspera'l chamin eau tschantaiva;
Il fö eira quasi stüzzo,
Duos chöttels la tschendra zuppaiva;
Il di eira bod tramunto.

Dad our spessa plövgia crudaiva;
Il tschüvel da vent lamentus;
Dad esser dalöntsch m'increschaiva.
La plövgia crudaiva sgrischus.

Daspera'l chamin eau tschantaiva;
Ils chöttels sun tschendra dvantos.
In tschendra la spraunza crudaiva,
Darcho da revair mieus amos.


1877.

Capri.

Straglüsch' il sguard dell' isolauna bella
Fand strasuner cun grazch' il tamburet,
Chitarr' intuna legra tarantella,
O simpel sot da magic, bel effet!

Con cour tranquil dell' isl' il pövel viva
Il di, la not pes-chand cun vair dalet
E staungel gescha sün la choda riva,
Containt usche sco raig nel meglder let.