alintanang naghahalat kan horas nin pamahaw. Hale sa pagparigos asin sa paginom kan pinagtotodan na sabaw nin lombod asin pagkaon kan laman kaini asin nasaorog karahay na kamugtakan sa pagtaltag nin mga biyaya asin mga karahayan. Minapaorog kan saiyang marhay na pagkamugtak su pangyayari na kaniguan na kasisikmol, tara si Padre Irene asin si Padre Sibyla, na saiyang mga kasugal, lambang saro nagpaluwas kan saiyang pakasabot sa tuyo asin hilom na pagpapadaog, sa dakulang kaangotan ni Padre Camorra na huli ta minadatong pa sana kan agang ito dai nagaaram kan mga pinagkakasarapakatan. Su fraileng artillero huli ta sa diosan su saiyang panugal asin nangangataman, namumula asin kinakagat su saiyang ngabil sa lambang pagkakalipat asin daing datang pagkalkulo ni Padre Sibyla, alagad dai nangangahas na sumabi nin ano man huli kan kagalangan nya sa dominico; alagad iyo nyang pinaghihimalos si Padre Irene na ibinibilang nyang hababa asin langisero asin pinagbabasangbasang sa tahaw kan saiyang kakulangan nin pakasabot. Dai lamang sya hinihiling ni Padre Sibyla; pinapabayaan syang magpisngak; si Padre Irene, orog kamakumbaba, naghihinguhang makapangatanosan na pinaghohorohapros su punta kan saiyang dongong halaba. Su saiyang Kahalangkawan nalilingang marhay asin nangungurawa, siring sa marhay na magpalakaw siring sa ipinadadamgo saiya canonigo, sa mga pagkakamale kan saiyang mga kalaban. Dai nagaaram si Padre Camorra nasa mesitang ito nasusugal an sa mapagisip na paguswag kan mga filipino, an pagtokdo nin kastila, asin kun naaraman nya, sakale sa kaogmahan ominayon gayod kuta sa sugal.
Sa balcon na bukas na gayo sa palaba, naglalaog su simuy, mahayahay asin dalisay, asin namamantaag su danaw na an mga tubig mahamis na naghihinghing sa pamitisan kan gadung na baga nagdudusay nin kagalangan. Sa too dapit, sa harayo, natatanaw su puro nin Talim, na bughaw na gayo; sa tahaw kan danaw asin haros sa atubangan, sarong puro-puro na hidyaw, su puro nin Kalamba, daing tawo, garong kabaak na talasinag; sa wala, su magayon na gilid na tinoroktorokan nin kabotongan, sarong kolod na nagdudungaw sa danaw, dangan mahiwas na mga kabasan dangan mga mapulang atop sa tahaw nin hudyaw na gayong mga
