langan nin kagalangan kan mga may apat na bitis sa kadlagan, siring sa ginibo nagkapira nang taon nin sarong alcalde na naglakbay na pigboboroligan nin mga polistas huli ta dai nin mga kabayong maboboot na makapamahala sa saiyang pagkatawo. Dai nahalaen nin sarong maraot na kaisipan na huringhuding na an Saiyang Kahalangkawan natatalagang gomibo nin sarong bagay, huli ta duman nakikita nya an mga enot na tanda nin sarong himagsikan na kaipuhan pooton sa pinaggikanan, na an sarong pangayam na daing kinaluwasan nakakarama sa ngaran na kastila, asin iba pa, asin pinagpasalibadan na an sarong makauugnay ta gugubingan nin sa usa, kasu an Saiyang Kahalangkawan sa sarong gawe nin pagkaugay na dai naaraman ni Ben Zayb kun anong mga kataga nin tataramon an ikakaomaw, nakapurawas kan gabos na mga kariworokan, ipinahayag nya na ikinasasakit nya na iatang sa saiyang kamongayahan an mga hayop sa kadlagan.
Sa katotoohan, an Saiyang Kahalangkawan asin napupuwasan inter se (174), tara anong mangyayari kun sominala nin minsan saro lamang, sarong usa na kabilang sa mga kulang nin pakasabot dapit sa mga pangangaipo sa politica? Saen masampot an marhay na dangog kan hade? Paano? Sarong Capitan General sa Filipinas magkamale, sa paghimunta baga bagong paraayam? Anong sasabihon kan mga indio nasa mga ini may mga regular na paraayam? Manganganib an marhay na dangog kan bansa ...
Sa bagay na siring huli ta an Saiyang Kahalangkawan kaiba an hilaw na olok asin bilang sa dai-namongayahan na paraayam, ipinagboot an madaleng pagbalik sa Los Banos, sa panahon kan paglakaw nagsasabi sya dapit sa saiyang mga kabayanihan sa pangayam sa Peninsula na baga dai nya oyon an bagay na siring sa sarong mapagbasangbasang na tingog, magkakanigo nanggad sa mga pangayam sa Filipinas, pse! An mga parigosan sa Dampalit (Daang pa liit), su mga mainit na burabod sa pangpang kan danaw, su mga surugal sa palacio pinagtataga balotan nin picnic sa haraning busay o danaw nin mga angongolkol minaanyaya nin lalong mga makadadagka asin bakong mapanganib na gayo sa dangog kan bansa.
Kan mga huring aldaw nin Diciembre itoon sa bidang su Saiyang Kahalangkawan nagsusugal nin tresillo,
