283
Asin huli ta pinagsasabi na an pagkabilanggong ito gikan sa panghimalos dahel saiya asin sa saiyang ama, su kamondoan kan daraga nakasampot sa pagkawarai nin pagsarig. Ngunyan nanongod na man saiya an pagligtas saiya, sii'ing kan ginibo saiya kan balukaton sya sa pangagurangnan, asin sarong tingog sa irarom nagsasadol saiya kan pakiran asin iinaatubang sa saiyang bandingan an sarong makagigiram na bolong. “Si Padre Camorra, su cura!” an sabi kan tingog. Kinakagat ni Juli su saiyang ngabil asin nagdadanay sa mamondong paghorophorop. Huli kan crimen kan saiyang ama, binilanggo su saiyang apo sa paglaom na sa siring na palakaw matunga su aki. Daing ibang makakapalibre saiya kundi si Padre Camorra, asin si Padre Camorra nagpahiling na dai sya napupuwasan na gayo nin mga tataranion sa paggiromdom sa utang na boot asin sa saiyang ugaleng katapatan naghagad nin pagpakasakit. . . Magpoon kaito naglilikay na si Juli na makasompong saiya, alagad pinapaghadok sya kan cura sa saiyang kamot, pinipildit an saiyang dongo, an saiyang pisngi, pinagsusubahan sya nin mga sobang may kaibang mga kiyat asin nagngingisi, nagngingisi na nagkokodot saiya. Si Juli an dahelan kan hampak, na ginamit kan marhay na cura sa nagkapirang hagbayon na nagrilibot sa barrio na pinagtogtogan su mga daraga. Su mga malicioso pagkahiling saiyang naglabay pormal asin doko, nagtararom sa tingog na mangyaring madangog nya: “Kun muya ako, maiindultuhan si Cabesang Tales!” Su daraga minaabot sa saindang harong mamondo asin dai namumugtak su mga mata. Naliwat na marhay si Juli; nawara su saiyang gayagaya, dai nin nakakita saiyang nakahoyom, pahanga na magtaram asin garo ngani takot na maghiling kan saiya mansanang lawog. Sarong aldaw nakita sya sa banwa na may dakulang oring sa angog, sya na parating maglakaw na mahusay an panggubingan asin sarong baldit naghapot ki Hermanang Bali kun baga an mga minahogot nahoholog sa gagamban. “Segurong seguro!” an simbag kan babaye asin isinaladawan saiya su sito na baga halena duman. Huli kan pagkabilanggo, an mga masipag asin mga
