“Anong mangyayari saimo?” an padagos kan ina na pinagtakop su kamot na duwa; “ngangaranan kang pilibistiero asin bibilingan ka! Pigsabihan taka nang magkaigwa ka nin, pakatios na magkamahoyo ka! Dai ako minasabi saimo na na maghadok ka sa kamot kan mga cura, aram ko na delicado an saimong pagparong siring kan saimong ama na dai nakakakaon kan queso sa Europa... Alagad dapat kitang magtios, dai magkaalo, magsabi sa gabos nin oho. . . Anong satong maginibo? An gabos nasa mga fraile; kun sinda habo, daing maluwas na abogado, dai man nin medico... Magtios ka, aki ko, magtios ka!”
“Nagtios ako nin makuri, ina; nagtios ako sa halawig na mga bulan!”
Nagpadagos si Cabesang Andang kan saiyang mga logologo. Dai nya hinahagad na pupahayag syang partidario kan mga fraile, bako man ngani syang siring; kaniguan an saiyang pakaaram na sa sarong marhay igwa nin sampolong maraot na nagkokoa kan pirak kan mga dukha asin ipinapadara sa destierro an mga rnayaman. Alagad an saro sukat na dai maggirong, magtios asin magtagal; daing ibang bolong. Asin pinagsasambit an ginoong ini o ito na huli ta nagpahiling na paciencioso asin matinios, minsan sa irarom kan saindang boot naoongisan ninda sa saindang mga amo, maghale sa pagkasorogoon nin mga fraile naging promotor fiscal; asin an koyan na iyan na mayaman na ngunyan asin mangyaring makaginibo nin mga kabangisan na mga segurong magkakaigwa nin mga padrino na masorog sainda laban sa katogonan, kaito saro sanang dai sukat na sa cristan, na mahayo asin makinuyogkuyog na napakasal sa sarong magayon na daraga na an padrino kan aki su cura...
Padagos an pagsambit ni Cabesang Andang kan halawig na lista nin mga filipino na mga mahoyo asin mga paciencioso siring sa saiyang sinabi asin sasambiton na huli ta bakong siring nagkaderestierro asin pinagoorosig, kan si Placido, huli sa sarong daing kahologan na pasarahotan, hominale sa harong asin naglagawlagaw sa lansangan. Linibot su Sibakong, su Tondo, su San Nicolas, su Santo Cristo, ribaraw asin baldi, dai pinagmangno su saldang, mani su horas asin kan pakamate lamang nin gotom asin kan pakamangno na dai syang kuwarta ta
