mapulang boot. Sa huring ining pook nakakita nin sarong lunadan na nalulunadan kan Vice Rector na si Padre Sibyla, kaibahan si Don Custodio, asin tinaohansya nin dakulang gana na dakpon su religioso asin iholog ito sa tubig.
Napasiring sa Escolta asin natotokso nang poonan na sagpokon su duwang agustino na nagtutukaw sa may tata kan bazar ni Quiroga nagngingirisi asin nakikipagsubahan sa duwang fraile na itoon sa laog kan tindahan na nasa maogmahon na mga orolayolay; nadadangog su saindang mga maogmang tingog asin madaging na mga arak-atak. Sa horoharayo natatapaan su acera nin duwang cadete na nakikipagdaldalan sa sarong dependiente nin sarong almacen; napasiring sainda si Placido Penitente sa pagbukas nin agihan, asin su mga cadete na mga nakakita kan madolom na kaisipan kan hagbayon, mga maalam (265) na nagpangiriway. Si Placido kan mga horas na ito nasa lasig kan hamo na pinagsasabi kan mga malayista.
Si Placido, alintanang naghaharani sa saiyang harong, sa harong nin sarong platero saen sya nageerok bilang sarong platero, naghihinguhang magkabaragaybagay nya su saiyang mga kaisipan asin pinaghahaman nya an sarong mokna. Mapuli sya sa saiyang banwaan asin manghihimalos sya sa pagpahiling sa mga fraile na dai napapagologolog nin basang an sarong hagbayon, dai man sya napapaglanghadan. Nagiisip syang magsurat tolos sa saiyang ina, ki Cabesang Andang, sa pagpasabot saiya kan nangyari asin sabihan sya na su mga clase pinipirintoan saiya sagkod noarin pa man, na minsan ngani itoon su Ateneo kan mga jesuita na mapapagadalan nya kan taon na ito, alongating gayo na dai tomogot su mga dominico na makalipat sya duman asin minsan pa mahimo, sa masunod na pagralabasan mangangaipo na magbalik sya sa Universidad.
“Sabi dai kami tataong manghimalos!” an sabi; “sumilyab an kikilat asin hilingon ta!”
Alagad dai pinaghohona ni Placido su naghahalat saiya sa harong kan platero.
Si Cabesang Andang minadatong pa sana hale sa Batangas asin napaduman ta mamamakal, masongko sa saiyang aki asin darahan sya nin kuwarta, tapang usa asin mga panyong sukla.
Pakatapus kan mga enot na pataratara, su makau-
