- 73
pagpanimalus sa kadaut nga ilang gihimo kaninyo . . . Kon dili
kamo nila tudloan sa ilang pinulongan, nan, hingpita ang inyo,
isangyaw siya ninyo, ayaw ninyo pagwagtanga sa lungsod ang
iyang kaugalingong hunahuna, ug inay kamo magabaton ug mga
maayong tinguha alang sa tibuok nga lungsod nga Pilipinhon,
inay sa mga hunahuna nga magaagad sa laing tawo, batoni ninyo
ang mga hunahuna nga gawas, aron sa ingon niana, ang Katsila
dili magaantus nga ania siya magapuyo sa iyang kaugalingong balay kay wala man nato mautang kaniya ang atong mga katungod,
ang atong pamatasan, ni ang atong pinulongan; aron ang Katsila dili ilhon sa lungsod nga tagadinhi, kon dili pagailhon siya
kanunay nga manglulunggob, langyaw, ug sa ingon niana, sa madugay kun sa madali makahuput kamo sa inyong kagawasan. Mao kini ang hinungdan nganong buut ako nga ikaw mabuhi.
Si Basilio miginhawa daw gikuhaan usa ka mabug-at nga butang nga iyang gipas-an, ug mitubag human mohilum ug makadiyot:
— Ginoo, ang dungog nga imong gihatag kanako sa pagsugilon mo sa imong pagabuhaton labihan da ka daku, ug balus niana sultihan ko ikaw sa walay lipod-lipod nga ang imong gipangayo kanako labaw da kaayo sa maabut sa akong mga kusog. Ako wala magaungod sa mga bulohaton bahin sa pamunoan, ug kon ako mitimaan sa pangayo nga gipasaka aron unta itudlo ang kinatsila, kadto tungud lamang kay nianang buhata nakita ko ang usa ka kaayohan alang sa pagtuon. Lain ang dalan nga akong gidulongan; ang akong tinguha mao da ang pagkunhod sa mga kagul-anan nga lawasnon sa akong mga katagilungsod.
Ang magbabaligyag alahas mipahiyum.
— Unsa man ang mga balitang lawasnon kon handing sa mga kagul-anang kalagnon? — nangutana si Simoun; — unsa man ang kamatayon sa usa ka tawo sa atubangan sa kamatayon sa usa ka katilingban? Kaha ugma-damlag ikaw mahimong usa ka bantugang mananambal kon pasagdan ka ug dili tugawon sa imong pagpanambal; apan labi pang daku kadtong tawo nga makahatag ug bag-ong kinabuhi niining lungsod nga hapit na katitii sa dugo. Ikaw, unsa may imong nahimo alang niining yuta nga nagahatag kanimo sa imong pagka-tawo, nga nagahatag kanimo sa kinabuhi ug sa imong kaalam? Wala ba ikaw masayud nga walay kapuslanan ang kinabuhi nga dili ihalad sa usa ka
