236
Sa katapusan, natapus ang unang yugto, ug ang Markis nakadala na kang Serpolette ug Germaine nga iyang mga binatonan, kining ulahi ang panagway sa maanyag nga mahadlokon, ug sa pagka kotsiro sa kuwanggol nga Grenicheux. Usa ka masipang pakpak nakapabalik kanila paggula nga nagginunitay sa kamut, bisan bag-o pa lamang nga sila naglinutusay ug nagpinuspusay, ug karon nagyangoyango sila sa atubangan sa nanan-aw ug nakigbaylo ang uban mga tinan-awan nga masinabtanon sa pipila sa ilang mga maghahalad.
Samtang nagkaguliyang, tungod sa nanag-ilog sa pagpangadto sa ilisanan sa mga magdudula aron pagpahalipay kanila, ingon man sa mga nanaka sa mga palko aron paghimamat sa ilang mga higala, ang pipila nagpagula sa ilang mga hunahuna mahitungod sa dula ug sa mga magdudula.
— Sa walay duhaduha, si Serpolette mao ang labing maayo sa tanan, nagkanayon ang usa nga nagpakaron ingnon.
— Alang kanako ang labaw si Germaine, ang matahum nga buagaw...
— Apan wala man siyay tingog ...
— Ug unsay sapayan niana?
— Apan sa kabigot sa lawas, kadtong taason...
— Ps... silang tanan walay pulos, wala kanilay sarang kanganlan nga artista, misagbat si Ben Zayb.
Si Ben Zayb mao ang magsasaway sa “El Grito de la Integridad,” ug ang iyang sinultihan nga mayubiton daw nakapadakung tawo kaniya sa atubangan sa mga walay alamag.
— Si Serpolette walay maayong tingog, si Germaine dili maayong mokihol; ang ilang honi dili honi ug dili kita makakitag arte sa bisan unsa.
Aduna man ugoy mga tawo nga aron sila tuhoan nga maayong laki, manaway sila sa tanan. Labut pa, duha da ka tikit ang gipadala sa tag-iya sa dula sa buhatan sa mantalaan.
Sa mga palko, ang tanan nangotana kon kinsay tag-iya niadtong walay sulod. Kadtong tawhana maoy nakadaug sa tanan, kay maoy katapusan nga mosulod. Ambut diin maggikan ang mga sultisulti, nadungog nga kadtong palkoha kang Simoun. Ug ang balita natinuod.
