185
— Deremoff!, misinggit ang Amerikanhon.
Ang tabil nga nagalibut sa lawak nanlupad, ang mga kingke ingog mapalong, ang lamisa milaga-ak. Usa ka tingog mga maluyahon mitubag sukad sa ilalum sa kahon. Ang tanan nanluspad ug nahadlok: usa ka ginang, tungod sa iyang kalisang ug sa diha nga mibati nga nabasa ang iyang sapot, migunit kang pari Salvi.
Ang kahon naukab dayon sa iyang kaugalingon sa atubangan sa kadaghanan, ug sa atubang sa kadaghanan miguho ang usa ka ulo nga may panagway sa minatay, gilibutan sa tag-as ug labong nga buhok. Ang ulo mibuka paghinay sa iyang mga mata ug gilibut ug tan-aw ang mga namati. Masiga uyamut ang iyang mga mata, tungod tingali kay gilibutan sa badlis nga lagum, ug, sanglit abysus abysum invocat, kadtong mga mataha didto motutok sa mga matang lawom ni pari Salvi, nga nabuka pag-ayo, sama sa nakakitag usa ka abat. Si pari Salvi misugod pagkurog.
— Karon, misulti si Mr. Leeds, suginli kining mga namati kon kinsa ikaw!
Mihari ang usa ka kahilom nga halawom uyamut. Usa ka hangin nga mabugnaw mihuyop sa lawak ug diriyot makapalong sa mga siga sa kingke. Ang mga nagpaisug-isug gipangulbaan.
— Ako si Imuthis, mitubag ang ulo sa usa ka tingog nga lawom, apan makalilisang; natawo ako sa panahon ni Amasis ug gipatay sa panahon sa mga Persas, samtang si Cambyses mipauli gikan sa iyang pagkaparot sa kabukiran sa Lybya. Gikan akog nagtapus sa akong pagtoon, human sa mga taas nga panaw sa Gresya, Asisya ug Persiya, ug mipauli na ako sa akong yutang natawhan aron sa pagpuyo didto hangtud nga si Thot motawag kanako sa atubangan sa iyang makalilisang hukmanan. Apan, tungod sa dautan kong palad, sa pag-agi ko sa Babilonya nakasusi ako sa usa ka makalilisang tinagoan ni Seerdis, nga miilog sa gahum, ang dili mahadlok nga salamangkero nga si Gaumata, nga namunoan gumikan sa paglimbong. Sa iyang kahadlok nga isugilon ko siya kang Cabyses, gipapatay ako, pinaagi sa mga pa ring ehiptohanon. Sa akong yutang natawhan kini sila kaniadto mao ang namunoan; sila maoy nanag-iya sa duha sa tulo ka bahin sa mga kayutaan, sila ang nagkupot sa kinaadman ug gikubong nila ang lungsod sa kaburong ug panlupig, aron sila masayon nga himoong ulipon gikan sa usa ngadto sa usa. Ang
