176
— Ay aw patuyang, pari; kusi-a lamang ang imong tiyan ug pasagdi kami, gitubag siya nga naglagut ni Ben Zayb.
— Mao kanay dalaga! mao kanay dalaga!, miusab pa gayud siya sa pagtuaw; ug ang iya ra bang hinigugma akong tinonan, ang tigtulod.
— Palaran siya nga dili siya sakop sa akong lungsod, mipadayon siya sa pagsulti, human molingi makadaghan aron Pagnunot pagtan-aw sa dalaga.
Si Paulita nagpadayon sa paglakat, ug makita ang iyang maanindot nga nawong ug ang iyang ulo nga maayong pagkapangko, inubanan sa pamayhon nga makaibog.
Ang atong mga higala nagpadayon sa ilang paglakaw-lakaw, ug ang atong prayleng artilyero kanunay lamang nga nanghupaw, hangtud nga miabut sila sa usa ka tindahan nga puno sa mga tawo nga nanan-aw, nga namahawa lamang usab dayon sa pagkakita kanila.
Kadto maoy usa ka tindahan sa mga larawan nga kahoy, nga nagkalainlain ang dagway, gikak-on ug bulok, ug diin gihulad ang tanang propesyon sa kapopod-an, mga indiyo, katsila, insik, mestiso, prayle, klerigo, kawani, gobernadorcilyo, tinon-an, sundalo, ug uban pa. Tungod ba kaha kay ang mangungudlit mahigugma nga mobuhat sa mga larawan sa mga prayle, kay ang pilo sa ilang sapot mahiangay sa iyang kinaiya, kun tungod ba kay ang mga prayle daku man kaayog kalihokan sulod sa katilingbang pilipinhon ug kini nipili pag-ayo sa hunahuna sa mangungulit, ang tinuod mao nga kadaghanan sa iyang mga larawan pulos sa mga prayle, nga naghulagway kanila sa ilang mga bulohaton, apan dili sama sa oropa diin ang mga prayle gilarawan kanunay nga mangatulog sa ibabaw sa mga baril sa alak, magsugal sa baraha, mag-inum, kun manghikap sa mga aping sa mga dalaga. Dili, ang mga prayle sa Pilipinas laig kinaiya: nga posturado, malinis ug sapot, angayan nga manlihok, maayong pagkatupi, ang panagway ugdang, sama sa mga balaan, mapulapula ang aping, magdalag baston sa kamut, sinul-ob ang sapatos nga sarol sa tiil . . . sa usa ka pulong, makadapit sa atong pagtahud ug pagpahiluna kanila sa ilalum sa mga birina nga bildo. Samtang ang mga prayle sa Oropa mao rag gutum ug ulit ug kundatan. ang sa Manila magdala kanunay sa basahon, krusipiho,
