157
kita sa tanan ug nga makapanagana sa tanan, ug bisan tugutan ta pa nga makahimo siya niini, dili angayan manuyo, kay anaa tan-awa ang simbahan dili ba kanunay lamang nga nangayo ug nangayo kang Bathala nga nakakita ug nahibalo sa tanan, ug bisan ikaw mangayo ug daghan uyamut sa mga hukmanan nianang kagamhanan, ug bisan pa niini, si Bathala ug ang mga Hukmanan wala pa mangasuko hangtud karon. Anaa sa tanlag sa tanan nga ang Kagamhanan, tungod kay tinukod sa mga tawo, nagkinahanglan sa pagtabang sa uban, nagkinahanglan nga ipakita ug ipabati kaniya ang tinuod nga kahimtang sa mga tawo. Bisan ikaw wala motoo nga makatarunganon ang imong pagsupak; ikaw nahibalo nga maoy usa ka Kagamhanan nga malupigon ug mabangis kadto nga, aron lamang pagpakita sa iyang gahum, magdumili sa tanan ipangayo kaniya, gumikan sa kahadlok kun
sa kakulang sa pagsalig, ug nga ang mga lungsod da nga linupigan ug ulipon ang nagtoo nga wala silay katungod sa pagpangayo bisan unsa. Usa ka lungsod nga nagdumot sa iyang Kagamhanan walay laing mapangayo kon dili nga iyang mga ponoan mobiya sa gahum.
Ang tigulang nga manlalaban naglingolingo lamang, nagpaila sa iyang wala pag-uyon; mohikap sa iyang ulong upaw; human, sa usa ka paningog nga maloloy-on, mitubag:
— Hm. mangil-ad kanang mga hunahunaa! Mangil-ad kanang mga pagtulon-ana! Maila gayud nga ikaw batan-on pa ug walay hibangkaagan sa mga butang sa kinabuhi. Tan-awa kon unsay nahitabo sa mga batan-on nga atua sa Madrid nga nangayo daghang mga kausaban; sila gituhoan nga mga Filibustero; kadaghanan kanila mahadlok nga mopauli, ug tan-awon ta ra, unsa may ilang gipangayo. Mga butang balaanon, karaan ug hibaloan na sa tanan . . . Apan adunay mga butang nga dili ko ikapahimangno kanimo, kay malisud kaayo... tan-awa ... itug-an ko kanimo nga adunay daghang mga katarungan, gawas sa giasoy ko na, ngano nga ang usa ka Kagamhanan modumili sa mga tinguha sa usa ka lungsod ... dili... mahimo nga mahitabo nga ikahibalag nato ang mga ponoan nga andakan ug kataw-anan . . . apan daghan pa gayud ang mga katarungan . . . bisan ang gipa ngayo makatarunganon uyamut . . . ang mga Kagamhanan lainlaing kahimtang . . .
