- 143
Ang kimpang gipakaingon nga siya ang gibiaybiay ug nahimangod, ang uban nanugok aron sa pag-ulang, apan ang matuod nilang tinguha mao ang pagtupo sa duroha, ug nahinayon ang sinumbagay.
Sa kan-anari, usa ka batan-on nga nakadala usa ka lata nga sardinas, usa ka botelya nga bino ug uban pang makaon gikan sa ilang lungsod, nanapit nga hapit na lamang namugos sa iyang mga kauban aron mosalo kaniya sa pagkaon, samtang ang iyang mga higala nagpadilidili usab. Ang uban nangaligo sa sotiya, nagsinabligay sa tubig ug nakalingaw sa mga nanan-aw.
Apan ang kasaba ug kaalingasa mianam ug kawala sa diha nga nagsugod pangabut ang mga bantugang tinon-an, nga gipanawag ni Makaraig, aron iyang sayran. kon unsay gidangat sa akademya sa kinatsila. Si Isagani gidawat sa dakung kahinangop, ingon man usab ni Sandobal, nga maoy usa ka katsila nga nahi-anhi sa Manila kay nahimong kawani ug nga dinhi na magtapus sa iyang pagtoon ug nagpakita kanunay nga siya samag pagbati sa mga pilipinhon. Ang mga po litika nga makaulang :sa mga tawo nga lainlaig kaliwat mawagtang kon anaa sa eskuelahan, mao rag matunaw sa kainit sa kinaadman ug sa kabatan-on
Kay wala may mga Ateneo ug mga pundokanan sa mga makainaadmanon, mga magsusulat ug mga politiko, si Sandobal magpahimulos sa tanang panagtigum aron pagbansaybansay sa iyang pagkamaayong mosulti, pinaagi sa paghimog mga pakigpulong mahitungod sa bisan unsang butanga, nga pagapakpakan sa iyang mga higalang mamati. Niadtong higayona ang gihisgutan mao ang pagtudlo sa kinatsila.
Sanglit si Makaraig wala pa moabut, ang mga pagbanabana maoy naghari.
— Unsa kahay nahitabo?Unsa kahay gimbut-an sa Heneral?
— Gidumili ang pananghid? Makadaug si Pari Irene? Nakadaug si Pari Sybila?
Mao kining mga pangotanaha ang diha sa tanang baba, mga pangotana nga si Makaraig day makatubag.
