92
iyang nakita daw ingon ug nagabiay-biay sa kadaut nga midangat kaniya; kadtong tawhana miadto didto aron pagpatuod sa iyang labihan ka dato ug kadto giatol da ba gayud sa bisperas sa adlaw nga siya mapilit pagpahawa niadtong balay nga iyang gitukod sa iyang kaugalingong mga kusog, tungud kay wala man siyay salapi, tungud kay wala man siyay mga sandiganan.
— Aniay duroha ka brilyanteng maitum, nga samag gidakon sa labing dagkung mga brilyante sa tibuok kalibutan, — miingon si Simoun; — malisud kini kaayo nga sapsapan tungud kay maoy nga bato nga labing magahi . . . Kining bato nga mapula-pula brilyante usab, ingon man kinig malunhaw ug bulok nga pakaingnon sa uban nga “esmeralda” siya. Si insik Quiroga mihagad kanako nga iyang bayran ug unom ka libo ka pisos kay iyang igasa sa usa ka babaye nga makagagahum uyamut . . . Apan kining mga brilyante nga malunhaw dili mao ang labing mahal ug bili, kon dili kining mga bughaw.
Ug gigahin niya ang tutolo ka bato nga dili kaayo dagku, apan pulos baga ug maayong pagkasapsap ug adunay bulok nga bulobughaw.
— Bisan tuod kining mga brilyanteha gagmay da kay niining lunhaw — mipadayon pagsulti si Simoun — apan ang usa kanila mobili ug duroha niining nahiulahi. Tan-awa ninyo kining usa nga maoy labing diyutay sa tanan — ang iyang gibug-aton dili molabaw sa duroha ka “quilate” — gibayran ko kini ug kaluhaan ka pisos ug dili siya nako ibaligya ubos sa katloan ka libo ka pisos. Aron pagpalit niana mituyo gayud ako pagpanaw. Kining usa ka, nga hingkaplagan sa mga mina sa Golconda, timbang ug tulo ka “quilate” ug tunga, ug ang iyang bili labaw sa kapitoan ka libo ka pisos. Ang Virney sa Indiya, pinaagi sa usa ka sulat nga akong nadawat kagahapon, mihagad kanako nga paliton niya ug napulog-duha ka libo ka “libras esterlinas.”
Sa atubangan niadtong dili maisip nga mga bahandi nga natingub sa kamot niadtong tawo nga magasulti sa dakung kalinaw sa buot, ang nanag-alirong mibati ug kataha nga sinagulan ug kalisang. Si Sinang nanglitik ug makadaghan apan wala siya lusia sa iyang inahan, kaha tungud kay kini nahingangha uya mut kun tungud ba kay mituo nga ang usa ka magbabaligyag alahas nga sama kang Simoun dili magaapas ug lima ka pisos nga makapin niya sa iyang patigayon tungud lamang sa mga panakla kun panglitik nga iyang mabati bunga sa kahitingala
