90
ka diyutayng mananap nga pak-an nga bughaw ug bukobuko
ug masihag ang tiyan; ang “zafiro,” ang “esmeralda,” ang “rubi,” ang “turquesa,” ang brilyante nanagtipon aron mahimong alindahaw, kabakaba, mga ligwan, mga putyokan, mga bakukang, mga bitin, mga tiki, mga isda, mga bulak, mga bulig, ubp.: adunay mga sudlay nga samag panagway sa “diadema,” mga “gargantilla,” mga kwintas nga mutya ug brilyante nga labihan katahum kay ang mga dalaga wala makapugong ug nahigula gayud sa ilang baba ang usa ka “naku” gikan sa kahibulong, si Sinang nanakla, ug tungud niini gilusi siya sa iyang inahan nga si Kapitana
Tika, kinsa nahadlok nga tungud niadta mahalon unya ni Simoun ang iyang nga alahas. Si Kapitana Tika molusi gihapon sa iyang anak nga babaye bisan kini naminyo na.
— Anaa makita mo diha ang mga brilyante nga karaan — miingon ang magbabaligyag alahas; — kanang singsinga gihuptan kanhi sa prinsesa sa Lamballe, ug kanang mga ariyos kaugalingon sa usa ka “dama” ni Maria Antonieta.
Maoy matahum nga “solitario” nga brilyante, nga samag gidakuon sa lugas sa mais, adunay kinidlap nga bulobughaw, mga maanindot uyamut ug katahaan nga sud-ungon, daw nagatipig pa sila sa kakulba niadtong mga adlaw nga gitawag sa Kasaysayan ug “El Terror.”
— Pagkaanindot nianang duroha ka ariyos! — miingon si Sinang nga mitan-aw sa iyang amahan ug sa wala lamang niya tuyoa gisalipdan niya sa kamot ang iyang bukton nga nahiduol sa iyang inahan.
— Aduna pa gayud ing labing mga karaan, ang mga ariyos sa mga babayeng romanhon — mitubag si Kapitan Basilio dungan ang pagpiyong sa iyang pikas nga mata.
Ang biyata nga si Hermana Pentsang nagpalandong nga kon kadto maoy iyang igasa sa Birhen sa Antipolo, dagway malukmay kini ug sa walay duhaduha ihatag gayud kaniya ang butang iyang gitinguha sa dakung kainit: dugay na kaayo nga siya nangayo sa Birhen ug usa ka “milagro” nga masaba ug makagubut unta sa mga tawo diin mahiapil ang iyang ngalan aron dili gayud hikalimtan dinhi sa yuta ug unya human niini moadto siya sa langit sama ni Kapitana Ines sa mga kura, busa nangutana siya sa bili niadtong mga pahiyasa. Apan si Simoun nangayo ug tulo ka libo ka pisos. Ang buotan nga babaye nanguros. Susmariosep!
