Sa pagka-ingon ugma, sa dakung kahibulong sa tibuok nga balangay, mihangyo nga moabut sa balay ni Kabesang Tales ang magbabaligyag alahas nga si Simoun, kinuyogan ug duroha ka binatonan nga nanagpas-an ug dagkung mga maleta nga pinutos sa panapton nga “Iona.” Sa taliwala sa iyong kakabus, si Kabesang Tales wala malimot sa mga maayong batasan sa mga Pilipinhon ug nalibog ang iyang ulo sa paghunahuna nga wala siya ikapahinangop niadtong dumoduong. Apan si Simoun nagsangkap sa tanang kinahanglanon, mga binatonan ug mga balon, ug naghunahuna lamang siya pagpuyog usa ka adlaw ug usa ka gabii niadtong balaya, tungud kay kini mao da man ang maarangarang niadtong balangay ug tungud usab kay kini nahimutang man sa kinaang-angan sa San Diego ug sa Tiani, mga lungsod diin siya nagpaabut ug daghang mga pumapalit.
Si Simoun nagpakisusi sa kahimtang sa mga dalan ug nangutana kang Kabesang Tales kon ang iyang rebolber igo na bang makapanalipod kaniya batok sa mga tulisan.
— Aduna silay pusil nga ang bala makaabut ug hataas nga gilay-on! — miingon si Kabesang Tales nga nagpalingoglingog lamang.
— Ang bala ning akong rebolber moabut usab sa samang gilay-on — mitubag si Simoun ug giluthang niya ang usa ka punoan nga bunga nga diha sa gilay-on nga duha ka gatus ka lakang.
Si Kabesang Tales nakakita nga nangatagak ang pipila ka buok nga bunga, apan wala motingog ug rnipadayon paghinuktok.
Wala dangtig dugay nanag-ulhos-ulhos pag-abut ang pipila ka
banay dinani sa kabantog sa mga alahas ni Simoun: naghinatagay sila ug maayong Pasko, nanaghisgot ug mga misa, mga santos, mga dautan nga alanihon, apan bisan pa niini ang salapi
