Diad kaimbuasan, ed baleg a kelaw na sankabarrioan, sinmabi ya mipapagtuloy ed abong nen Anakbanwan Tales si managlakoy alajas a Simoun ya iba to ray duaran ugugaw ton mansasakbat na ankakabaleg iran malita ya insupot ed lona.1 Si Anakbanwan Tales anggan onman lay segsegang ya aratngan to, agton siansia natilak so maabig iran ugáli ed Pilipinas, tan masiadoy kagugulo tan kababaigan to ed pannodnunot ton anggapoy panankaili tod sinmabin dinmawes ed abong to. Si Simoun balet awit to lan amin so nakaukolan, ugugaw to tan kakanen, tan anganggad kinerew to so mitondan sanagew tan sanlábi, manlapod sikatomay sankaabigan ya abong ed saman a barrio tan nisesengeg met ed walad nanpegleyay San Diego tan Tiani, duaran báley irayan paniilaloan ton panlapoay dakel a manaliw na alajas a tagilako to.
Kakábaten nen Simoun so itsuray daladalan tan tetepeten tod Anakbanwan Tales no saman kasi paltog to et masarag lan mangilaban ed sikato ed saray tulisan.
"Walaray pusil dan arawrawi nasabi bala ra!" kuanen Anakbanwan Tales a singa nalilibang.
"Sayay paltog ko ay arawi met so sabien to!" kuay ebat nen Simoun a bansag na impangipaltog ton impaarap ed sakey a bwa ya kaarawi to angankoy duan lasus a kondang.
Anengneng nen Anakbanwan Tales ya apaktak so pigaran bwa, balet ta ag inmesel tan intuloy toy sinonunot.
Diad ag abayag, mansasbi ray pigaran boleg ya atanggúyor na nibabantog a dakep na alajas iran tagilako nen Simoun. Nanbabanoan iran angiter na maabig a paskó, tan asalsalita da ray misa, sasantos, makapoy ya aní, ya angga-
____________________
1 Abel a makapal ya ag natalus na danum,
