masamit, bongá, ono bengabengat lad tan ya andi kakabaliksan.
Si Tandang Selo sankanengneng toray kakaaro toran onlalabas tan sankanunot ton napnoy ermen ya saman a taon anggapoy nipaaginaldo to ed anggan siopa, tan si apó to sinmipot met ya agto apaaginaldoan, tan ag met la angiter na maabig a Pasko. Ginagala kasi nen Julí ta pian agla mapatpatnag ya anggapoy nipaaginaldo to, odino alingoanan ton talaga?
Nen ilugay irá nen Tandang Selo ya patuloyen iramay kakanayon ton dinmalaw cd sikato ya awit daray ának da, baleg so inkikelawan to ta agto makasalita: maong lay gagaween to et anggapoy ompaway a mogmon tanol. Binenbenan toy beklew toy sanduan lima to, impeyengpeyeng toy uló to, et anggapon siansia. Nen sinali toy onelek, manggiwgiw iran pinasiay bibil to balet ta say alenleneg a pinmaway a tanol singa labat malungolungog a sibok bilang na angiob.
Saramay bibiin wadman nannenengnengan ira ed baleg a inkesegawan da. "Naemel, naemel!" kuandan nandiringan ya akebiew, insan da iniay baleg a ingal tan guló.
