a pamaakaran ya isisipen dan makapaabig, balet agda natetebek a diad katuaan et makapauges ed baley dan dili so gagaween da..... Aminpiga la, ya labay koy misalita ed sikayon nanoulop, ipabirbir koy inkasiak tan ipaliwawak so kalilingo yo, balet say makapopukpok ed siak labat say pakaamtak a manlapod kipapásen kon makapoy a too, et sananey so
pangitalusan yod saray salitak tan aliwa la ingey kasumpalan.....Aminpigá lan labay ko wari onsingger ed kinen Makaraig tan si Isagani, wala ni ra ingey insebang tod ulok a magmaong la no ompatey ira tan ninunot ko ran apusan..
Tinmonda lamet si Simoun.
"Sikato yay makasengeg na agko pamateyan ed sikayo, Basilio, anggaman diad panggawak nia et nayarin nasabi agew a nalingó kayo tan nipaway yoy yaamot ko..... Sikayo ta kabat yoy inkasiak tan agmet maamot ed sikayoy impanermen ko tan impanirap ko ra, walay pananisia yod siak! Aliwa kayon singa saray karaklan a say nanenengneng da labat ed alajiron Simoun et si komirsianten manosugsog ed saray mamakauley a manlames tan manpaunong ta piano saray apaunong tan alamés et mansaliw irad sikatoy alajas ya irigalo ra..... Siak so Okum a labay kon dusaen so sakey a kurang na uley a diad panggawak nia ikanak iray dílin mauges a gawa to, ya babakalen ko legan kon pápabulan.....Nakaukolan koy tulong yo, nakaukolan ya ikana yoy biskeg na pakayari yo ed saray ibiba yon tubonbalo ta pian nasumpá ratan a selang tan andi kakanaan iran pilalek a yalig ed saray ugáli tan salita ray kakastila, pipára ed pankatonungan.....No sikato tay ilulot, anganggad nasabi yoy mialalig ya agyo ni nimet naukpos ya aminpinsan iray labay yon áligen, tan say baley tayo manepeg a manpirawat na sabien ton mas maong tan atagtagey! Kalukoan itay takpanen ya umanen so panagnunot day manouley; sikara, say totumboken da ayari da lan indátak, ya aliling day akapereng so matá ra, kanian andibali ni pandarak yoy panaon lolukoen yon patí say báley a paniilaloen yod ag nayári, tan makakaiba kinin mangimemermer a mangipapatewek na uló to ed arap day mangaruksan manouley. Say nepeg yon gaween samboten yoy lingoy kanunotan da ya ikana ed pankaukolan yo. Agda kayo labay a nadili na bansay España? Lalon abig! Biig kayo sirin ya iparungtal yoy inkasikayon díli, tan ganap yon iletneg so petepeteg a pangigapoan na bansay Pilipi-
