to, insan nanbigote tan nanbalbas; sa balet so kanenengneng to
agni naoman, sikatoniman a maerermen na ampaipait, ambilbilunget met ni muling to, saman met niray taklay ton maregkel, anggaman singa la ra yinmumis na daiset, saman met ni
biskeg ton singa nantarok na sanok. Aliing irad sikatoy linmabás; singa to sankalik nay petang ton may mandarlang a talaksan, say eras tod saman, ermen to tan kapoy na linawa to, samay sengaw na dálin a kapankutkot....mapalaloy inkakebiew
tod saman ya asukayan to. No ontan sirin si alajiron Simoun
ya isipen day totoon mestisoy indio tan inglés, portugés, amerikano, mulato, samay tatawagen day Cardenal Moreno, Eminencia Negra, tan ibábaga ran mansusugsog ed Kapitan General
ed gawa tora nian aliwá. anggapoy arum no ag samay toon
agto kabkabat a say inlesá to tan inkaandipat to et nibanbana
ed impatey na tomatawir ed saraman a daldálin. Diad saraman balet so duaran agto kabat, samay inatey tan samay mabilay, siopad sikaray Ibarra ey?
Sayan tepet ya lanang ton tetepetan ed inkasikaton dili kapag nasalitay impatey nen Ibarra, wala lamet ed nunot to ed impakanengneng tod samay toon anggapoy petepeteg a makatalus a wadman ed arap to natan.
Samay inatey duaray sugat to ya nakná angankoy paltog uneng na inaral to nen bandad unor, tan nala to ran mapilit la legan na impangusil dan pangaabot dimad libsong ed si pirison akabatik. No ontan sirin samay inatey sikatoy Ibarra, ya impegdat to lági impatey to ed lubok nen láki to, tan say pilalek ton papoulay bangkay to mainomay a talusan no nonoten so impanayam tod Europa ya panggagawaan day onia. Siopa sirin imay sakey ey, sayay mabilay ay, sayay alajiron Simoun a nengneng toy masegsegang nen saman, insan balet natan pinmawil a daakan toy balitok tan kakaaro ton amin iray manouley? Wala diay ag natalusan, tan si Basilio unong ed naugaliyan ton ambetel ya impanguló, tinalaga ton palinewen tan nanalagar na okasion.
Agni tinmonday Simoun a mankokutkot, balet si Basilio sankanengneng ton anggapo la may biskeg ton gendat; maningás, masegpet so kalilinawa to, tan mabetbet ya ontonday daiset a manpainawa.
