nengneng tod saman a lakí. —atagey, amalangá ray matá to,
amespesiaw iray bibil to tan matontondiris so eleng to.....
Olin sigpot, anggapo ran ateng tan agi to, tinmaynan ed saman a báley ya ontan lay takut tod saray manouley, tan linmad Ibale ya nunot toy paugaw ed abong na sakey a mayaman tan manaral met a singa gagaween day arum. Saman a impanbaroy to abaybayag, mabetbet ya ag makakaugip tan natataktakut, anggaman agto nanirapan a maong so eras to, ta panbibilay toray bungabungá ray kakiyewan ed saray katakelan a susupokan ton aamotan kapag nabantag toy uniporme ray Guardia Civil, unipormen makapangipapanunot ed sikatoy gapoy amin a segsegang to. Nen akasabid Ibale, ya apilpilat a marindingot so kawes to tan agmakayari, liberliber a manaanap na pankimeyan to. Et siopay mangalad sikato ey, a sakey ya ugaw a nanlapod lúyag ya anggapoy amta ton ni sakey a salitay kastila tan agmakayari ni nimet! Andi ilalo, narnarasan, maerermen, liberliber ed saray kalansanganan a natatawag toy imano ray totoo ed kawes ton agilaygilay! Aminpigan anunotan to lay patalapos ya onsabat ed saramay kabayon manlalbas a singa ra kirmat ed peles da ya mangagayúgoy na luganan iran manesiab ed barnis tan ukop daran pilak, ta piano manganggá laray irap to! Kapalpalaran to ta anengneng toy Kápitan Tiago ya iba toy Tía Isabel. Sikato kabat to laran nanlapo nid San Diego tan diad liket to singa akanengneng ed sikaray díli ran kabaleyan to. Tinumbok to may luganan, abalangan to, tinetepettepet toy panaayaman da tan nalmo to.. Manlapod saman imay agew ya inloob nen María Clara ed konbinto, tan mapalaloy ermen nen Kápitan Tiago, anggapo lay dakel a salitaan, inako ran manayam diman ya ag mansueldo balet ta nayarian toy manaral no labay to ed San Juan de Letran.¹
Maringot, akolisaysay, akulastay tan akasuckos, kalabas na pigay bulan tod Ibale, linmasor a manaral na latin. Saray ibiba to, kanengneng dad kawes to paliisan da, tan say manbabangat ed sikara ya dominikon maong a lakí, agton balot tinepetan, a kapag nanengneng to ni ingen et onkuliseng. Say alen-
_______________________
1 Kolijio yan panbabangatay elementaria tan high school ya ikukurang day papárin dominiko, ya saraya malabí ran tuloy ed saray ának day kakastila ten saray pilipinon mamayaman. Sara balet sa pilipinon duka ya manaaral diman agda ra asikasoen tan lemlemewen dara. Agda ra italtalek a say pananawag dad sikara bata ya singa ra bilang kutsiro.
