tikoen ono dusaen manlapod imbagad sikatoy sakey a Hermano
tercero ya benditado ra.
Sankaunoran so Virgen ya sinolongay kawes na Divina Pastora tan nansombriro na frondeuse ya malaplapar so bulong to tan pináparakep na andurukey iran mamalongpalong a buyaboy a pangipanengneng na impambaroy ton linma ed Jerusalem. Tan piano natalusan so Inkianak, si kúra ingganggan ton pabalegey awak to tan suksukay sapey toy loplupot tan kapes ta piano ag napanduaruaan so kipapasen ton paanakanak. Sayan talintao maong a bii, maermen met balet so nengneng na lupa ton singa saray amin a talintaon gawa ray pilipino, tan singa awey toy nababaingan nisengeg lágid itsuray impamakawes nen pári kura ed sikato. Walaray pigaran kantores cd onaan to, saray músiko balet manomtumbok ira ya kaolop da ra ngolay pigaran Guardia Civil. Si kúra nisesengeg ed ginawa to, mapatnag lan ag pinmarungtal ya angilibot; saman a taon mapalaloy ingungot to ta irap to ran pinaesel so totoo ya akaukolan toy amin ya impangasi Dios ed sikaton panangúyong tan nipakana toy anggaay amta ton Tagalog a pikewet, ta piano bayaran day tonggal talomploy pisos kapag sakey a misa na aginaldo ya aliwan duamplo ya singa ibabáyar dan gendat.
"Manmamaliw kayon filibustero"1 kuantod sikara.
Mapalalo angankoy inkakusoy kanunotan ton may kutsiro ed saray anengneng tod libot ta nen kalabás to nia tan inbaga nen Basilion ikurang to lay luganan to, agto naimanon say sakey a parol na karomata et narep. Si Basilio agto met naimano ta say nenengnengen to balet saramay kaabongan a sinisilewan irad paway may loob na ankekelag a parol a papil a nambabangil ya itsura tan kolor, tan bitewen iran niliber na basikaw iran mankidiam ya andurukey so ikol da, ya diad panisiplog ed sikaray dagem et singara manesesaes na masamsamit, tan sisiran manggalaw so ikol tan uló ra ya insasabitsabit irad silong na paritpit, tan walay silew dad dalem a tinsim ya inyan ed basoy larak ya sikaray mangiiter na malikeliket tan naugaliyan a kanengnengay pista. Naimano met nen Basilio ingen ya onkakapoy tan ondadaiset iray silesilew, saramay bitewen singara ombibilunget tan sayan taon
________________
1 Pilipino ya napapalsaan onó nidalem a labay to tan mankikimey ed kaalyay Pilipinas ed España.
