kogkugtot so kabayo tod abay da ran tay duaran kakastila ay
(si arin Gaspar tan si Baltazar) impangaw da la komon."
Tan manlapod naimano ton nanbalanget met imay pugót tan ári met a singa saramay duaran kakastila, mapilit lan anunotan toy ári ray indio tan nginmeswá.
"Amta yo, sinyor," kuanton magalgalang ed kinen Basilio, "no say salin kawanan et akalukpos la?"
Si Basilio inoman toy tepet a nikelawan:
"Salin kawanan nen siopa?"
"¡Si ári!" kuanen kutsiron makalkalna ya napnoy mistirio.
"¿Siopatan ya ári?"
"Si ári tayo, say ári ray indio....."
Akaimis si Basilio tan sinintak to ray abalá to.
Si kutsiro nginmeswá lamet. Saray indion taga uma walay nantatawiran dan tagaomen a say ári ra ya impangaw tan ginolonggulongan ed sakey ya ungib ed San Mateo, onsabi sakey ya agew a mangilaban ed sikara ed kapapaunong, tan kakairapan da. Kapag sanlasus taon ya onlabas napeklá toy sakey ed saray golonggulong ya anaker ed sikato, tan alokpos to la ray duaran lima to tan salí ton kawigi, kanian kulang labat lay kaukpos na salí ton kawanan. Sayan ári sikatoy makasesengeg na saray yegyeg no onsiwagkal, ta ontan lay biskeg to ya no pipasamanoan, nakaukolan a pukel so yawat ed sikato tan saya natemek a manmaliw a dabok. Anggapoy amtan makasengeg no akin et say impangingaran day indio ed sikato et Arin Bernardo; no bilang nababaloan da lágin Bernardo de Carpio.
"No naukpos to lay salí ton kawanan," kuanen kutsiron. inmeremeré tan pinukpokan toy panngeswá to, "iter ko lad sikato ray kabayok tan mansirbiak ed sikato ya anggan naratngan koy patey..... Sikato lay mangilaban ed sikami ed saray Guardia Civil."
Tan pakpaknuyotan to ra may taloran Ari ya kanenengneng toy maerermen.
Manomtumbok iray ugugaw a lalaki ed duaran dasig a nengneng day maermen tan mabinbinta, ya singa bilang pinasout iran akilibot. Say sankabenbenan dan silew iray arum, sinigit, saray arum kandilan sinelselan; walara met so nanaawit
