labinduan kuarta, tan sikato labat lay makasesengeg na pisusugalan ko. Ta agko napalabas itay kontalengen daak!"
Tepeten lawari sakey ed saramay wadman no akin sirin et agto bayaray nakdaan nin utang tod sikato, et si makabat a panggingira ta anginap la, pinasakbayan to lan imbalang a tampol so tungtongan ya inkuanto:
"Amtam Julí no antoy nayarin gaween? Isalnam laingen yay abong na duan lasus tan limamploy pisos, a bayaran no manaloy amam ed kulkol."
Sankaabigan la yan anunotan tan nanpapaknaan dan agla ipamaya ya gaween a tampol ed saman ya agew. Si Hermana Balí, inoprisi toy laman ton mangibad Julí tan sikaran dua tinunog day kaabongan day mamayaman ed Tiani, balet ta anggapoy mangako ed saman a kondision; say kuandan amin ta atálo la may kulkol tan say mangasi ono manulong ed sakey a kabusol day papári singa to isusugbay laman ton irapen da met na linawan balesey mauges. Say asumpalan to walay sakey ya akulaw a marasal a naplag so panangasi tod Julí tan pinautang ton may kakaukolan ton kuartan isapot dapot no manayam ed sikato ya legay agto pakabayar. Kuanto ta anggapo met so dakel ono ambelat a pakimeyan tod Julí, mandait, mandasal, ibaan ton mimisa tan sandian ton manayuno no arum. Si Julí akipakna ya manaklebey so lua to, inawat toy kuarta, tan insipan ton ompawil ya onggapo lan manayam ed kaimbuasan, agew na Paskoy Inkianak.
Nen akabatan nen láki to yan inkagawa inyan toy akis a singa ugaw. Panon? Samay apó ton agto panpapaagewen ta piano ag natektek so baog to, si Juli ya mayumyumis a kinmandila ray gamet to tan rosarosa ray mukor to, panon? Saman a marikit a walad kaaliguasan, a sankagangganaan a biid barrio no ag pati diad báley ni ingen, ya ontan lay karaket na babalolakin ompepetek ed sikato, panoy inkagawa? Alenleneg ya apó to, kuentay alenleneg ya anak to, tan alenleneg met a ligliwa ray naksawan la ran matá to ya pikugip ton nasabi agew a mansapey na nandikola, makasalitay kastila, tan mamaypaypay met na pinintaan a singa saray ának day mamayaman, onloob natan a paugaw a panpasnokan dan pantamian, naderal la ra may gamet to, unogip ed anggan iner a sukong, tan ombangon na anggan antoy oras?
_____________________
1 Say pisos sanlasus tan anemaplon kuarta.
