"Nakaukolan a bantayan ko ray tinanem ko," kuay ebat ton apasakey; "kapag unas ya onsusulming ditan kabaliksan toy sakey a pukel nen asawak."
Inekalan da lamet na barang ta kuandan mapalaloy dukey to. Diad saya inala toy daan a wasay nen amá to, tan sikatoy sankasak bat to ed panaakarakar ton makakebiew.
Kapag onsipot natatakut si Tandang Selo tan si Julí ya ipápagaan day bilay to. Saya, ontondad panaabel to, mantandag, dasal a dasal, nambabangil a sipan tod saray sasantos, tan nanlalatop so nobinas to. Si láki to, no arum ngalngalin agto natunton so manggaway kondiling na panis tan ibabága ton magmaong lay ompawil a manayam ed takel. Ngalngalin agla nisungdoy itsuray panbibilay dad saman ya abong.
Asabin siansiay papagaan da. Manlapod arawrawi ra may tataneman ed polok na katoowan, naplag si Anakbanwan Tales ed lima ray tutulisan ya agto nipakanay wasay to ta dipaltogan iraya lanti. Say kuandad sikato so wala met lan lamang so kuarta ton niiter tod saray abogado, wala met sirin so niiter tod saray masegsegang a napapaunong, kanian kinerewan day liman lasus pisos a panundon ed sikato, ya impasabi yay imbáki ran sakey a duká ed boleg to, tan impatalus dan malinlinew a no naano man ya imbáki ra, bilay nen Tales so onsandí. Say geter ya inter da dugduay agew.
Sayan balita angiter ed boleg toy agnabaliksanan a takut, lalo la nimet nen naamtaan dan ompaway iray Guardia Civil a mangerel ed saramay tutulisan. No makapansasangal ira anggapoy duarua ya say ononaonan ompatey si Tales, tan saya amtay amin a too. Ag akagalaw si masiken ya alimbawa toy nanmaliw a bató, tan si anak singa pineresay lupa to, diad inkataktakut to, aminpigan labay toy onsalita, anggapoy ompaway a bosis to. Balet ta sakey ni lamet a kanunotan a lalon makakebiew tan masulit so amabilay na dala ra. Say kuanton may imbaki so ngalngalin onarawi ra may tutulisan, kanian no agda niiter a tampol imay pilak ya idundon, onlabas lay duay agew, tan pakgeran da lay Tales.
Singa naambagel iramay duara, totoon maletey ya anggapoy nagawaan. Si Tandang Selo onalagey, onyurong, onakseb, onsegep, agto amtay gaween to, agto amtay apirengan to. Si Julí no ag mantaltalimokor ed arap day talintao, bilang a bi-
