papey, ya ontan lay abig ton mamunta ya anggapoy nasasápo,
ya asabisabin samay oldog a mangaasikasoy dálin na Togiop
day papári et antakut lan ompaway ya onlad Sagpang no anggapo ray ibiba ton guardia civil; tan samay toon napalalabian
a labay dan pangiteran wari ran may daldálin, ábantag to labat
so ambelabelat ya itsura nen Anakbanwan Tales a manliliber
ed úma to ya aliling na bantay ya ontotunton ed tagey na padir,
ontan lay insabi takut to tan sinmuner ya aminpinsan ya agto
la labay a samsamen iramay úma to.
Sara balet so okum ed báley (Juez de Paz) tan ontan da met na okum ed kapital na lúyag, ag ira onmatalek a mangiter ed sikatoy pankatonungan ta mapaga ran tuloy a naekal ed kipapasen da ta aderiá la ra ed inkagaway sakey a kaiba ra ya nakal a tamtampol. Tan saraman ya okum aliwa man iran mauges, totoo ran masumpal ed nabebetangan da, maptek a kagagawa tan panagnunot, maong iran mibabáley, maaro ran atateng tan magalang, matulok iran ának..... tan mas ni pikakabat dad kipapasen nen masegsegang a Tales nen say pakatalus ton díli. Dakel ed sikara kabat dan petepeteg so totuntonen iran ganggan a nipaakar ed pankayrian, a pati ni ingey sengegan da ra nian ganggan, amta ra ya saray papári nisesengeg ed saray totuntonen da met iran ganggan ed inkapári ra, agda nayariay mankayrian na bengat la, balet ta amta ra met a sakey a toon nanlapod arawin dálin, binatak toy kadayatan ed pangegna toy betang ya irap ton ginamoran, a nilutoluto tod linawa ton gaweey anggaay nayarian to ed panumpal toy nabebetangan to, insan to natan naikbanan iman a betang makasengeg labat ed sakey ya indio ya sinmeksek ed uló ton tuntoney kaptekan diad dálin ya unong ed tawen.....ay, sananey met la yan panagnunot! Sikara walara met so kabólegan da ya anggapoy duaruan dakdakel ni ray nakaukolan da nen saray kaukolay boleg ton may indio; samay sakey walay ina to ya tataganoen to, tan ¿wala ni lági mas sagrado ya legpeten nen say sakey ya ina? Samay sakey met walaray agági ton bibii ya mamarikit; samay komatlo akamayamay so ának ton ankekelag ni ya singara pinepegpeg a tubong ya aalagden day kanen dan aliling da ray sibong ed ubong ya ompatey iran andi saew ed agew a kaekal tod anapan to; tan saman lay sankaraisetan lay sakit na uló to, wala nin siansiad mad arawin dálin so asawa ton diad agto
