kob na kasalanan tan kakisiray pakatalus day arum, pangaskasiyan iran kaamaan ya aliling day nilakanat ya inalad kaabongan da ya pankimeyen ya andi kakanaan ed dalan iran uumanen a kinabuasan a singa panpalabasay oras pian labat napasegsegang iray ataynan a boleg da..... Ah! mantepel....mankimey....sikatoy linaway Dios! Sali yo ray napapaunong a panisiaen a say pamatey ed sikara so kawalaay kilalaban da,
ya walad pamapakimcy ed sikaray bonigas na boleg da tan yaliguas na bilay da! Mantepel....mankimey.... Anto tan a klasi Dios ey?"
"Sakey a Dios a sankaptekan, sinyor Simoun," kuay ebat nen pári, "sakey a Dios a dúsaen toy kakulangan tayoy pananisia, saray mauges iran gawa tayo, say panlelemlemew tayo ed kabintaan tan kagalangan, panangaro tan panangiansakit ed ombaley tan dilin bansá.... Palálabasen tayo tan minonunong itayod bisio, no arum idayew tayo ni ingen, kanian manepeg met sirin, sankanepegan, ya itepel tayo ray onsabid sikatayon kairapan tan ontan da met na saray ilálak tayo. Sikatoy Dios na kawayangan, sinyor Simoun, a pasouten to itayon mangaro tan mamablid satan a kawayangan diad pangipalikna tod sikatayoy belat na kipapasey aripen; sakey a Dios na panangasi, na andi nilabin kaptekan ya diad pangipaakseb toy dusa et mangiter met na kaabigan, tan ipagamor toy inawa cd saman labat so makankanepegan makasengeg ed impansagpot to, ta say eskuilaay kairapan pasekderen toy linaway too, say lawak a panbabakalan pabiskegen toy kamarerua. Agto kabaliksan niay say labay kon ibaga et gamoran tayoy kawayangan tayo ed tarem na kampilan, ta say kampilan samsamet lay kikakana tod balon kurang na bilay ed gagatinan ya panaon, balet ta, on, pian narakep tayo, nakaukolan a gamoran tayo ed pamabonay pakatalus tan pangitagey na kagalangay sinansakey, ya aroen lawas so kaptekan, karcnungan tan katageyay suri ed gawa may kanunotan, a sikatoyay pipateyanan, tan no say sakey a bansá et arapat to la ya, say Dios met tulongan ton andi saew, nabagbag iray anitó, natumtumba ran napalanit so mangaruksa ya singa abongabong a nipis, tan onsinag so kawayangan ya aliling na pinmelnak a liwawad kabuasan! Say onsasabid sikatayon kaugsan nanlapod sikatayo lan lamang, kanian ag manepeg ya ipakasalanan tayod sananey a too. No nanengneng labat na España ya aliwan ontan lay panamalamlam tayod uley
