isagarsagar dan igaygayugoy imay atumba ya nagatinggatinan
dan manyesyes kalamor dimad dabok a mantagtagloung lan
onkekerew na patey. No arum napalaranan toy makabangon
tan makaalagey ya itobat tod satay akar ton mangoyangoy a
singa ugaw tan isamsamba toy bektan intoo to.
Saraman a sankamunil a totoo ontonda ra no maminsan no oninom iramay manetengteng ed sikara, insan da lamet itobat so akar da ya amagaay taektaek da, abilungetay kalakal da, tan napnoy apgó tan sambay kapusoan da. Diad saraman a masegsegang singa anggapo lay kuentay inkapgaan da.
"Siglat yo, anak na p....!" kuay sondalon yingaingal, ta binmiskeg ed satan ed ininom to, ya manlaldak so panangibaga toy panamabaing a matalagpit ya ayew day abeban inkatoon pilipino.
Onngisiw ed satan imay sangá ed pangisikdak to tan ondapod siopaman beneg, samay sankasinggeran, ya no arum diad lupa, ya nanengneng a say panlapoan to, ompoti, insan ombalangan onsireg, ya ombetag no arum insan lad satan ompitek no napano lay dabok na dalan.
"Siglat yo, puros a payoti!" kuanton ikasikasil no arum ed salitay kastila ya ipalongog ton maong so bosis to.
"Payoti!" kuan met na anyeweng ton may palandey.
Tan saramay payoti siglatan da kalamor so akar da ya petang na petek dan tawen so aliling na manalopaop ya impoul a balatyang tan nasisinitay dapán dad petang na dalan ya aantabayen iran susonsoncy mapungepunget a sanga ya napipisag a nasisigsig ed abagalbagal lan baog da. Mamainomay pa ni lágin isungdoy mapalaion betel ed Siberia1 nen say petang na agew na bulay Mayo ed Pilipinas!
Onia man, diad saramay sondalo walay sakey a nanengneng ed matá toy agto piabubon ed onman lan andi kakanaan a panagpairap: andi esel ton manaakar, asilot so kirep to ya singa walay agto napapaknaan. Nen samay guardia et kulang to ni may pansisikdak ton sanga tan ginapoan to ran dedepakay nipapatingorngor ono nipaparukol a periso, agla akakpel tan iningalan ton apultot so ános to:
"Sia pala, Mautang, tondaan mo la ra kari!"
Pinigaran nen Mautang a nikelawan.
__________________
1 Pasen a mapalaloy betel ed Rusia ya dakdakel iray totoon ompapatey ya onaawet ed betel no panaoy sibilao.
