mangayaman, yanoyanon panagnunot ed saray walad kalangueran, tan dia labat ed kapalandeyan, diad pasen iran panangipaálisan so akalmoan kod saray totook. Balet ta andibáli! No
agtayo napapaway so marakep ya ayadyarin talintao, ya pinopinon singa nilálik ed amin a pasen, say magásal a baton sapsapan tayo akauley laran mangapiger so manomtumbok!”
Insan to binenbenan ed taklay si Basilion mandengdengel ya agto natetebek ya ami ibábagad sikato, tan inakar tod man ed kimeyan ton silir ya pangitatalakan to ray nambabangil a tamtambal tan arum niran ikakána ray kimiko.
Diad tapew na sakey a lamisan walay sakey a baleg a kajon a katat ya magket a mialaan ed kajon iran pananginay kubiertos iran pilak ya naugaliyan dan iiter na mangayaman tan saray atatagey a mamakauley no manririgaloan ira. Nilokasan nen Simoun imay kajon tan anengneng ed dalem ya akagaton ed apis ton sutlan ambalanga so sakey a lamparaan a dumadumay nengneng to. Say pananginay petrólio bilang singa sakey a bongay granada ya kabaleg na ulóy too ya puros ankablin baton ágata ya kolor na dalá odino balangaan. Say ukis balitok ya oxidado tan singa ukis na granadan petepeteg pati say inkagurelgurel to.
Inalsa nen Simoun ya inapipiger, inoyos to may pabilo tan anengneng ya say dalem ton may lamparaan balatyang ya duaran centímetro angankoy kapal tan nakarga toy masugsulok a sakey litro. Nengnengnengen nen Basilioy Simoun a singa ontetepet, ta anggapoy natatalusan to.
Andi esel nen Simoun tan andi met impaliwawa to no agta inapipiger ton inalsay sakey a prasko ed sakey a estante. tan impanengneng tod Basilioy akasulat ed impeket a papil.
"Nitro-glicerina!!" inmeremeré nen Basilion akasuner tan agto apukpokay impangian to ray lima tod beneg to. "Nitroglicerina! Dinamita!"
Tan nen atalusan toy kanunotan nen Simoun, binmegas ya amin bagó to.
"On, nitro-glicerina!" inoman nen Simoun a matantantan ya imis toy ambetebetel tan nengnengnengen ton makaliliket imay praskon salming; "aliwan nitro-glicerina labat! Luá ran pinmalet, pankabusol ya ag imbesngaw, lamés, gawa ran sungpad katonungan tan makapasákit. Sikatoy mogmon katonu-
