Biglán nanwakas so bilunget na muling nen Simoun, kinmidiam iray matá tod dalang na pananalo, tan inkuan ton singa nalmo to lan siansiay abayag to lan aanapen:
"Walay katonungan ko, on, walay katonungan ko! Walad dapag koy pankatonungan, walad dapag ko met so kaptekan, ta say pamaakaran ya gaganapen ko, kaabigan day masegsegang..... Salamat, Basilio, salamat! Linma kayo dian amunas niray duaruak, tan anekder na linawak a talinduaan."
Inmalagey si Simoun ya lupa toy maliwliwawa; samay layap na linawa to ed apat bulan lan linmabas diad samay bektan pangipapaliwawa tod Basilio ray kanunotan to, dimad takel daray laklaki to, nanengneng lamet ed lupa to ya aliling bilang na amalangan iseselek na banwa, kalabas na sanagew a malurem.
"On," kuanton intuloy; "naapay inmonan imparaan ko ta dakel iray binmeneg ed siak ta anengneng daak ya makulang na sekder tan manduarua nen asabí tinandaan a bekta: ya say akasengeg ta wala ni atilak a liknaan ya agni narep ed pusok, agko ni asigpot ya ouleyan iray liknaan ko, tan mangaaroak ni!.... Natan inatey lan ami liknaan ed pagew ko, anggapo lay bangkay a masagradon say malet ya ugip toy nepeg kon galangen! Manlapod natan anggapo lay panduarúa; sikayon díli ya tubonbalo kayon napnek na kaabigan, malapátin anggapoy apgó bilang, natalusan yoy pankaukolan, tan linma ki diad siak ya mangitoldon. Atantan so inkalukasan day matá yo! No akapantekep itayon asasakbay dakdakel komoy niparaan tayo tan agawaan tayo ran marakep tan makapaabig: siak, binetang ko ra komoy walad tagey, saray atagey ya inkatoo tan mangayaman ya imbuyak ed utel day patey ya katekep to ray balingit tan balitok ya impasen ya andi kalakal iray sipor lan mauges tan mabisio, tan sebelan ko ran manggaway maabig so nabilang bilang iran maong; tan sikayo balet onbanda kayod abeba, diad utel na báley, diad saray tubonbalo ya paligsaen yon pabilayey liknaan da ed nangis tan dalá! Say kimey tayo ag nipasen a masulit tan maruksa no agta nibagan mapangasi, ayadyarid abig, napnoy karakpan, tan anggapoy duaruan arapat tayo komon ya agamoray pilalek ya nansagpotan tayo! ta anggapo lanti matudion pakatalus ya ginmabay ya ontulong ed siak; takut odino maletey a linawa so asagmak kod saray totoon atagey a pakatalus tan akaaral, siblet ed pulok day Balet
