"Kabat yo lan peteg so pakayári to; impaway toy lúki yod pangawan.....Saksakey labat a salita to masulosulok lan mangipaalis ed sakey a kapangianak, ono mangilaban ed patey ed toon ibibítay."
Andi esel nen Julí, si hermana Balí balet apakpaknaan toy simbawa nen Juez de Paz a singa abasa to lad nobinas, tan sipaparaan a mangibad Juli ya onlad konbinto. Sakey ni, onla nin lamang ta mipayábol na sakey a karmen a salatan toy pisos.
Si Julí balet manpeyeng tan agto labay so onlad konbinto. Makakainap lay hermana Balí ed makasengeg na agto labay ya ákaran.....ta say pananawag dad pári Camorra no arum et Si kabayo ta pilyo lantí.....kanian eékalen toy pága to.
"Antoy antakut mo ey et iba moak?" kuanto; "agmo ta abasad samay libron melag a Tandang Basio ya inter nen kúra, ya saray mamárikit et kanepegan ya onla rad konbinto anggano agda amtay áteng da, ta pian natungtong dad kúray nagagawad abong? Antoy agawam, agmo ta amtan walay abuloy nen Arzobispod impangigalot ed saman a libro?"
Nanaalipanesan lay Julí tan manlapod labay to lan pultoten iman a salitaan, akikasid kinen akulaw a marasal ya no labay to sikato lay onla, et say kuanen sinyor Juez a mansirak ngola, so mas makatenyeg iray pikakasi sakey a lupan malanguer ni nen say lupay akulaw, a say tawen mas so panangibonlok toy linaew ed saray rosas a kabusbuskag da nen saray amagaan. Sayan impangialimbawa singa aparakep ton asanibay onman lan karumsisan.
Ag inmebat si Julí tan iman la ran dua nen akulaw. Kasabí rad lansangan impaawet ton ag onlad konbinto, kanian pinmawil la rad barrio. Singa makababarong si hermana Balí ya mauges so linawa to ed ag pamiya nen Julid sikaton kaulop, tan ombabales a sisirmonan toy andukerukey.
Say katuaan so ag naako nen Julí onlá, ta diad yakar to natetel ton pankasalananey inkasikaton díli, tan ontan met a pankasalanen day totoo tan pati dílin Dios! Aminpigá lan impasabí rad layag to, walay katuaan to may anggapo, ya no onabuloy labat lan mangibagat na inkasikato, na indultuan a tampol si ama to, et impaawet ton agto, anggaman ontan lay pangikokungkong na konsiensia ton dilin pangipapanunot na nepeg ton susumpalen ed ateng to. Panoy panggawa to natan a nisesengeg ed Basilion kaarowan to ey? Elekan da labat lan balbalawey
