"Ay ina, tua sirin!" kuanton may lupay tanga, ya sinigsisia to lan tampol.
"Si Quiroga," kuanton intuloy, "walay sanlasus libon mek¹ to ed paway na doroongan. Panoy pangiloob to ey? Kanian anunotan toy nanggaway konwarin paspaskin a sinambot toy kuestion day estudiante, tan legan day totoon aguló..... pum! Pinalkapan to ray empliado tan matintinunos so inloob da ray kajokajon ton angiluganay pilak!"
"Tua, tua," kuanton may masisia ya intabig toy poniti tod lamisaan. "Tua! Kanianti manayan si intsik Quiroga et..... kanianti!"
Tan akatonda ta anggapoy amta ton ibagan nipaakar ed kinen intsik Quiroga.
"Insan, sikatayoy manbabayar?...." kuay tepet nen Chichoy ya ampetang so uló to.
"Ehem, ehem, ehem!...." kuan lamet nen plateron insigam ta dengdenglen toy manasingger iran manaakar ed lansangan.
Manasingger a tua ra may tanol na akar, kanian tinmonda ran amin a mansasalita.
"Si San Pascual Bailon baleg a santos," kuanen plateron inkasil a mankonkuanan, tan kinindatan to ra may arum; "Si San Pascual Bailon..."
Diad saman a bekta indonglaw nen Plácido Penitente lupa tod pinto ya kaolop to may managgaway koitis ya anengneng tayon bibilinen nen Simoun. Niliktob da ran duan ontetepet no anto ray balon balbalita.
"Agko apisalitaan iramay impangaw," kuanen Plácido; "sakey a talumplo ra anganko!"
"Manparaan kayo!" kuanen gumagaway koitis a nanlimgisan ira nen Plácido. "say dengel ta sayan lábi dakel so putolan....."
"Ha? Karol!" kuanen Chichoy a manligab so matá ton manaanap na armas, tan nen anggapoy nanengneng to, sininkat toy sop!ete to.
Inyurong nen maestroy platero ta manggiwgiw iray pueg to; samay masisia singa sankanengneng to lay inkasikaton aputolan tan nanangisan to lay palar a datngen day boleg to.
___________________
1 Pisos ed Mexico.
