- Vox populi, vox Dei.1
Tinaynan tayoy Isaganin sasalitaan toray kakaaro to. Pelés ton mansasalitan napnoy dalang na linawa sininggeray sakey a capista ya angibagan labay a pitungtongan nen pári Fernandez. a sakey yad saray manbabangat na atagey laran aaralen.
Abaliw so lupa nen Isagani. Diad sikato, si pári Fernandez sakey toon gagalangen; sikatoy alenleneg a lawas ton ililikor no ontan lan walaray mansasalitay sungpa ed saray papári.
"Akin, antoy labay nen pári Fernandez a?" kuanton tinepet.
Sinintak nen capista ray abalá to; tinumbok nen Isagani ya mauges so uló to.
Si pári Fernandez, samay párin anengneng tayod Los Baños. manaalagar dimad silir to ya mabinbinta tan maerermen, ya asilot iray kirep ton singa mannununot na araldalem. Inmalagey nen anengneng ton linmoob si Isagani, inlugay ton pinasamano, tan inkapot toy pintó, insan mamaspasiar ed biek tan biek ton may silir to. Manalalagey si Isaganin manaalagar na pisalita tod sikato.
"Sinyor Isagani," kuantod nagogonoyan ed bosis ton giwgiwan; "dengdenglen koy pansásalita yon angga diad dorongawan ko, ta lapod tísiko ak, maong so pakangel ko, tan labay ta kayon pisalitaan. Siak maálak lawas so linawak ed saray tubonbalon malinew so panagsalita ra tan walay díli ran panagnunot tan kagagawa, ya anggapo may walad siak anggano duma ray kaisipan da ed panagisip ko. Unong na nangelan ko, nandoroipo kayon nandem kalabian, agkayo manbabaraan....
"Agak pa manbabaraan!" kuanen Isaganin sinmalabat.
"Lalon abig, ta pakapatnagan itan ya aakoen yo lawas a sesekderan yoy bongay gáwa yoran díli. Sakey ni makapoy ya
_________________
1 Say besis na báley, bosis na Dios.-289-
