saramay palbangoy diciembre no kayari Misa de Gallo, say
panangiawat toy danum a bendita ed kinen Paulita, tan say
kababales to nia no limgisen toy napnek na panagaro, say kakigtot dan dua ed pakapandiwitay gamet da. Manngesngesway
ankakabaleg tan nanonunotan ton amin iray anlong, amin iray
imbabaga may insusulat day omaanlong tan sumusulat a nipaakar ed kalamangay bii. Isamsamba tod loob toy inkilesay
teatro tan ontan met na sarsuilan francés, tan igagaem ton
halesey Juanito ed anggaay sakbay na pakayari to. Marmaermen tan marmauriem so pakanengneng tod amin a napangilingayan toray matá to; samay day at a singa nantataynan a kabukbukoran to, lalon nengneng toy kabukbukoran no imimanoen iramay pigpigaran sakayan ya akadoong; onseselek so
agew ed beneg na Mariveles ya anggapo may makaayayap a
dakep ton gendat, ni saramay marakerakep iran lurem a kolor
day manlangalang ed saramay ngarem a mapálar; samay monumento nen Anda1 ya aliwaliway inkagawa to, abeban matabatabá, magasal ya inkakimey, tan anggapoy kanengnengan to,
singa labat diman impatoon a sorbetis odino cake; saramay atatágey ya inkatoon manpapasiar dimad Malecon anggaman nengneng day malikeliket a napnapdad bilay, say pakanengneng tod
sikara singa ra sélek a kabusol day mitoo, agmangitaltalek, tan
mapasirayew; ontan met a pilyo tan mauges a inkabangat so
pakanengneng tod saramay ugugaw a manggagalaw dimad baybay a pipilipiliyen da ramay mapmaimpis a batobatod mad gilig
ya ibobunbontok ya ipupuntad tapew na daldaluyon, odino manaanap irad man ed buer na lukalukan ono galiwey ya erelen
dara labat ya anggapoy makasengeg tan pateypateyen daran
andi naala ran kaabigan; pati saramay kimey dimad doroongan
ya amitlo lan indadayew ton inggawaay anlong say pakaisip to
natan ed sikara andi kabaliksan, makapalpalek, a singa labat
galawgalaw na ugugaw.
Say doroongan, ah, say doroongan ed Ibale ya aliling na sakey ya anak ed aro ya nanlapod intoo to et aliwa lan dagdaiset so apaterter ton lua tan inter ton pamaabeba tan kababaingan! Maong lanti no diad ontan lan karakel na luan tinmerter et agto anganggaay naekal ya ompaway lan abulok.2
_________________
1 Sakey ed saray Gobernador General a nanuley diad Pilipinas nen panaoy kastila.
2 Andukey lan taon ya inggapoy kimey a panggagaway doroongay ankabaleg a sakayan; pigaran laksa lan pisos so agastos et anggapo ni nanengneng ya asumpal.
