"Aliwan tua!" kuanen Simoun ya iningal ya nagbay lupa ton amespesiaw," aliwan tua! Mabilay si Maria Clara, nakaukolan a manbilay! Sakey labat itan a payotin baraan..... ag inatey, tan ipaway kod konbintod sayan lábi ono ompatey kayo nabuas!"
Sinintak nen Basilio ray takeb to.
"Pigay agew lan agmakayari tan siak so ounlad konbinto ya mangaamtay itsura to. Nia, nengneng yoy sulat nen Pári Salví ya awit nen Pári Irene. Sanlabin nannangis si Kápitan Tiago ya angob lan angob na retrato nen anak to tan papipirdona....ya anggad impansungap toy dakdakel ya apian.... Tinugtogan day algonias natay ngarem."
"Ah!" kuanen Simoun ya inakop toy uló toy sanduan lima to tan ag ginmalaw.
Anunotan ton tua ya walay nangel ton algonias nen naakarakar dimad kaliberliber na konbinto.
"Inatey!" kuanton makalkalna ya singa labat aninon mansasalita: "inatey ya agko anengneng, inatey ya agto akabatan ya manbibilayak nisesengeg ed sikato lambengat, inatey a manlilik nay irap tan kaermenan....
Tan manlapod nalilikna toy maksil a bagyó, alimbosabos tan karol ya anggapoy ni sankaterter ya uran, pansibek ya andin lua, tan eyag iran ag inbesngaw ya ngalngali lan ombetag ed pagew to tan onlipuan singa apuy na bolkan ya andukey lan agew a naememan, biglan pinmaway dimad silir. Deng denglen nen Basilioy inakseb tod takayan ya akar toy singa mantongging a masigsiglat; nangel toy aglem a singa linmereg, aglem ya singa mangipapakabat na idateng na patey, araldalem, pinaspasia, maerermen, ya ag apukpokan nen Basilioy impakaalagey ton biglan ampotipoti lupa to tan manggiwgiw, balet ta nangel ton manarawi la ra may kondang tan alalkab a nikapot so pintod lansangan.
"Kasi met la a!" kuanton makalkalna ya sinmalmay iray luad matá to. Alingoanan toy panaaral to, akatangwa, balet ta anggapoy nanenengneng to, ta nonunoten toy bilay dan man a duan katao, say sakey balolakin tubonbalo, mayaman, atagey ya aral, anggapoy sebesebel to, nagawaan toy labay to, tan arapen toy marakep tan mabolaslás....tan samay bii malimgas ya andi kapara, andi taldeng, napnoy pananisia tan kasimpitan. binmaleg ya inantabay na panangaro tan gayaga, intalagad bilay
