binuskag so impawit kod sikayon libro; anggapoy panangiansakit yod bansa yo ....
Onebat lawarin onsungpay Basilio.
"Anggapoy kakanaay ibaga yo!" kuanen Simoun ya insigla. "Diad loob na sakey oras onterak so rebulusion no iter koy sinyal, tan nabuas anggapo latay aral, anggapo lay Universidad, say wala labat tulot tan pateyan. Imparaan ko lan amin tan maong so kasumpalan ton ton anggapoy sapo. Tan diad panalo mi, amin ira may anta nayarian day tinmulong ed sikami et agda ginawa, ipasen iran kabusol. Basilio, linmaak dian pampilien takayod ipatey yo ono maliket yon arapen!"
"Ipatey ko ono maliket kon arapen!" kuanen Basilion inoman a singa agto natatalusan.
"Say pila yod Uley ono say pitekep yod sikami," kuay ebat nen Simoun, "igampi yod saray mamapaunong ed sikayo, ono diad bansá. Mandisidi kayo ta kulang lay panaon! Linmaak dian mangilaban ed sikayo nisesengeg ed saray pannodnunotan tayo ran ag nabuknal!"
"Diad saray mamapaunong ono diad bansá!" kuanto nin siansian inoman a makalkalna.
Singa tataleman a belas si Basilio; sankanengneng toy alajero ya nipintad matá to ray takut; manbetel iray lima tan salí to, tan nambabangil ya agutgot iran kaisipan so manbabanlangan ed nunot to; singa to la sankanengneng so dalan nibilwak ed kalansanganan, sankarengel toy paltogan, walad utel day inaatey tan sugatan, tan dia lagid liket ton mantambal, singa sankanengneng toy inkasikaton dilin nansulong na kawes na doktor no mangopira tan manpoputot na salisali odino mangeekal na bala ya nikutep ed sugasugat.
"Walad limak so linaway Uley" kuanen Simoun ya intuloy. "Dinarak koy daiset a pakayari to ed totoo may kuarta ed nambabangil iran andi kakanaan a pamaakaran a pinopulag ko ed kayamanan a nayarian ton katlien. Amin day manouley wala ran asimpok natan ed sarsuila ya mareereen tan anggapon balot so inap tan pagpaga ra ya inisip da labat so mamalabas na labin malikeliket, balet anggapoy anggan sakey ed sikaran ompawil a manpainawa ya makapangigaton na uló tod dangaDakel iray totoo tan polok day sosundalo tan saray pangulo ra, ya manaalagar na iganggan ko. Impasisiak ed saray arum
