"Say talus na servantes, sirvientes, say domestiques balet domésticos.....
"Anto balet so nandumaay servantes tan domestiques ey?" kuanen Paulitan tinepet.
Ag agagay Juanito.
"Domestiques, saramay naamo lara tan abangatan laran maong; agyo naimano ya walaray say nengneng da et masebesebeg a singa anggapoy inkabangat da? Sikara tay servantes."
"Tua tan!" kuanen Donya Victorina; "bastobastos so kagagalaw da ran tay arum ay..... Insan say inisip ko la wari maong iran inkabangat ya amin ed Europa ya pinopinoy galaw da...Panon ta, et onlabas irad Francia..... kanianti!"
"Sst, sst!" kuan lamet na nangel.
Sa balet so agagaan nen Juanito ya ngaingalin agto la amtay sinkaten ton ibaga, sanen alukasan lay tindaan ya inekal lay saban ed pinto, insan saramay igaganggan a manaanap na panayaman da et agsi petek la rad mad kartel a mangibabagay kipapasen da. Samplora ono labinduan lalaki ya nengneng day bastobastos tan akaunipormi, ya sankabenbenan dad lima ray sakey a melag a sanga, pinmetek irad samay kartel ya angitatakay domestiques.
"Sikara tay domésticos!" kuanen Juanito.
"Nengneng day aganggano nin naamo" kuanen Donya Victorina; "nengnengen tayo pa ra tay mamimidio salbaji ni!"
Pinmaway irad satay labinduan bibii ya manonaan day maligligsa tan makitkitsing a Serpolette. Mararakep iray kawes da, akapeket ed awak day amonggomonggó ran rosas, masaysayaksak iran manimimis a nengneng day ambalbalingit tan makapaninninam, tan diad baleg a inkisegawan nen Juanito inmabay irad samay lusek ya angipeketay servantes.
"Panon?" kuanen Paulitan nikelawan. "sikara tay kuanyon salbaji?"
"Andi." kuanen Juaniton amagamagá; "alingo ra.. "alingo ra.....aka- pansasalátan iray pasen..... Saratay mantumbok."
"Saratay nanawit na látiko ay?"
Tinmanger si Juanito balet ta mapagpaga la.
"Saratan a bibii ay, sikaratan siri cochers?"
