"Say cancan ey?" kuay tepet nen Makaraig.
"Alagar ka kari, ta totungtongen da ni no iner so kaabibigan a pasen a sayawan da," kuay ebat nen Sandoval ya amagamagan mabinbinta.
"Andi duma rad saramay makaw ed pansitiría!" kuan lamet nen Pekson a nanaingungotan la.
Peles na sakey a biin iba toy asawa to ya onloloob ed saman a bekta, tan amaarap ed sakey ed saramay duaran palkon anggapo ni akayurong. Mamaspasian alabas nen reina tan parparlasan to ray matay totoon napnoy panlemlemew a singa bilang kuantoy: "Onor ak a sinmabí nen anggan siopad sikayo, puros a makapalpalek a probinsiana, naonor ak nen sikayo!" Agya panduaruaan ta walaray totoon gagagalaen day manpapaunor ya onsabid teatro ta ipapásen da yan tanday tagey na inkatoo, ya andi duma rad saramay lumbay burro¹ ya say sankaunoran et sikatoy análo. Tan aliwa yan galgalaw ta walaray lalakin kabkabat ya anta susto met so panagnunot da et, lablabien da ni paibitay nen say onsabid teatro ya kasakbayay inmonan akto. Samay liket tan pasirayew to balet nimay bii apapan tampol ta anengneng to may sakey nin palkon anggapoy akayurong; sinilot to ray kirep to insan to ginapoan a kinolkol si asawa to ya onman lay ingal ton akamayamay so inmalipanes.
"Sst! sst!" kuay mansutsot.
"Puros a mureng! Singa samay natatalusan day salitay frances!" kuanen biin lingawlingaw ed biek tan biek a napnoy panlemlemew, insan to tineregay palko nen Juanito ta singa dimay isip ton nanlapoan ton may sutsot.
Si Juaniton tuay walay kasalanan, nanlapo lad gapó say ipapatnag to so natatalusan ton amin a nengneng toy singa mamaong, manimimis, manelelek ni no arum a mantipak no walay titipakan, a singa saman bilang so anggapoy napapalabas ton ibabaga ra, ya anta agmet nibagan papalbengan to labat lad kagagalaw day pumapaway ta ngalngalin ag onlilimggis ed intablado. Sikato ta makabat lanti, ya no nipaakar ed kapilyoan et talabaan lad beneg, ibabaga tod Paulita ya agtola nakaukolay mankesaw ya onnengneng ed arawi, ta wala niray bibiin lalon malimgas..... Manbalangay lupa nen Paulita, isanib toy paypay to, insan to takew takeway matay Isagani ya mabin-
_______________
1 Ayep a mialaalaan ed kabayo, balet ta melag, malayag, tan aliwan mabatik.
