pandoroipoan dad Corte, sebel balet so antoman a diskurso ono
pansalsalita ya pantalimay kaisipan iran nipaakar ed manepeg
ya ikurang na polítika.
Si Don Custodio balet, aliwan mangirás, tan diad sikato aliwan salita ono panaglabay labat no ag ta tarok toy kimey, tan manlapod isisipen ton dia la natilak so pukel tod Pilipinas, tan diad pakaisip to met et sankaabigan lad sikatoy panayam tod sayan bansá, inbunlok to la diay amin a panangasikaso tan kimey to, ya ninunot ton palukakey Uley, tan ginapoan toy nanisip na mantotumbokan iran panamasimbálo tan kanunotan iran manpapalyagan ed dakep. Sikatoy akanunot ya, manlapod nangelan to nen walad Madrid a tinabla ray lansangan ed Paris, anggaman agda niya tutumboken ed España, imparungtal toy pangalig nia ed Ibale, ya panatan iray tablay kalansanganan ya impapasak a singa dingding na abong; sikato met so, diad pililikna tod ontan lan karakel na naririsgo nisesengeg ed luganan iran sanderuay dalig, ta pian napasakbayan la raya, ton inan iray luganan na sankaraisetan lay taloran dalig; sikato met so, nen komaduad pangulo na Togiop na Sanidad, linmad uló ton disenfectaen ya amin, pati saray telegraman manlalapod pasen iran kawalaay sakit ono sálot; tan ontan met a sikatoy, diad panangasi tod saray periso ya mankikimey a letakletak so uló rad agew, tan pian makapansimpit met na daiset so Uley ed gagastosen tod kawes da, insimbat ton magmaong a mantapitapi ra labat ed arap tan pankimeyen la ray lábi. Mankelaw tan mapalaloy petang na uló to no wala ray onsumlang ed saray kanunotan to, balet ta pasasamiten to labat so linawa to ed pannonunot tod samay kuan a no say too et walay ibábaga to, walaray mamusol ed sikato, tan ibábales toy irap na linawa to ya papaugesen to tan agto met akoen so amin day kanunotan, maong may mauges, ya ipaparungtal day arum.
Manlapod ipapasen toy inkasikaton liberal, no tepetan da no antoy pakaisip tod saray indio, say maparanay a yeebat to, ya singa bilang manggagawa lay balbaleg a kaabigan, so sarag day kimey iran ambelat tan ontan met na artes imitativas, a say labay ton ibagad saya, say músika, say panagpinta tan say panaggaway talintao, ya agto itilak so sipor lan ipapatumbok to ya nakaukolay andukey a taon a panayam diad bansá pian natalusan iran petepeteg. Ontan man no walay narengelan ton
